د افغانستان اسلامي امارت بهرنیو چارو وزارت تازه ویلي چې د سیمې او نړۍ هېوادونو سره یې اړیکې او تعاملات ورځ تر بلې د پراختیا په حال کې دي، سیاسي او اقتصادي ښکېلتیا یې سره زیاته شوې ده.
د دې وزارت د چارواکو په خبره، د اقتصاد محوره بهرني سیاست پرمټ توانېدلي چې منځنۍ اسیا هېوادونو سره سیاسي او اقتصادي اړیکې پراخې کړي او له ټولو سره د باورفضا رامنځته شي.
د بهرنیو چارو وزارت مرستیال ویاند ضیا احمد تکل وایي: « د افغانستان او سیمې هېوادونو او دغه راز د نړیوالو هېوادونو ترمنځ اړیکې ورځ تر بلې د پراخېدو په حال کې دي، د اعتماد کچه ورځ تر بلې لوړېږي او ښکېلتیاوې زیاتېږي. تاسو جریان کې یاست چې د افغانستان او منځنۍ اسیا هېوادونو ترمنځ تګ راتګ زیات شوی، په اقتصادي او سوداګریزو برخو کې پراخوالی راغلی. څه موده وړاندې د افغانستان اسلامي امارت هئیت د منځنۍ اسیا هېوادونو له استازو سره پر بېلابېلو برخو بحثونه لرل چې زمینه یې دېته برابره کړه چې د افغانستان او منځنۍ اسیا ترمنځ په اقتصادي، سیاسي او نورو برخو کې تعاملات زیات شي.»
کارپوهان بیا د بهرني سیاست په برخه کې د اسلامي امارت هڅه بریالۍ بولي او زیاتوي چې د بهرني سیاست دستګاه بریالۍ شوې چې ګاونډیو او سیمې هېوادونو ته قناعت ورکړي چې له افغانستان سره اړیکې زیاتې کړي.
دوی وايي، اروپايي ټولنې او نورې نړۍ ته هم په کار ده چې له افغانستان سره تعامل ته داخل شي او د متقابل درناوي پربنسټ رسمي اړیکې جوړې کړي.
د دوی ټینګار په دې دی چې افغان حکومت باید نړۍ ته دا قناعت ورکړي چې یوازې سوله ییز او با ثباته افغانستان د ټولو په ګټه دی.
د سیاسی چارو شنونکی شهزاده مسعود وايي: « افغانستان په اوسنیو شرایطو کې د منځنۍ اسیا او ګاونډیو هېوادونو او دغه راز له سترو سیمه ییزو هېوادونو سره د متقابل درناوي پر بنسټ هم په سیاسي او هم په اقتصادي لحاظ ښه روابط لري. همدارنګه اروپايي ټولنې او د امریکا متحده ایالاتو ته بویه چې د متقابل درناوي له مخې د نېکې رابطې لاره خپله کړي.»
د چارو شنونکی نجیب الله جامع وايي: « د افغانستان د بهرني سیاست دستګاه پراخې لاسته راوړنې لري، له سیمې سره د افغانستان تعامل پراخ شوی، مهم او سټراټيژیک هېوادونه له افغانستان سره سیاسي اړیکو ته راښکېل شوي. په کار ده چې دا سیاسي بهیر لا پیاوړی شي او نړۍ ته قناعت ورکړل شي چې یو باثباته، سیال او پرمختګ پال افغانستان ستاسو په ګټه دی.»
په ورته مهال، بهرنیو چارو وزارت وايي جدي هڅې يې پیل کړې دي چې د افغانستان او هېوادونو ترمنځ په سیاسي، اقتصادي او سوداګریزو برخو کې اړیکې لا پراخې کړي او له یادو هېوادونو سره له شته مشترکاتو مثبته ګټه واخلي.
د دې وزارت د چارواکو په خبره، له ټولو سره ښې او په متقابل درناوي ولاړې اړیکې غواړي او ترډېره یې په دې سټراټیژۍ کې پرمختګ هم کړی.
د بهرنیو چارو وزارت مرستیال ویاند په دې اړه وايي: « د افغانستان اسلامي امارت بهرنیو چارو وزارت تل په دې هڅه کې دی او ګړندي ګامونه اخلي چې د افغانستان او سیمې ترمنځ په سیاسي، اقتصادي او سوداګریزه برخو کې لا پراختیا رامنځته کړي. همدارنګه د افغانستان، ګاونډیو او سیمه ییزو هېوادونو ترمنځ چې کوم اقتصادي او ټرانزیټي مشترکات دي، له هغو سالمه استفاده وشي، ترڅو د افغانستان د رفاه، ځان بسیاینې او ولسونو د ترقۍ لپاره کار وشي.»
په ټوله کې باور دا دی چې لرې نه ده د مرکزي اسیا هېوادونه او د ایران په شمول د افغانستان ځینې نور ګاونډيان هم له کابل سره خپل شته سیاسي، اقتصادي او سوداګریز تعاملات په رسمي اړیکو بدل کړي او د مسکو په څېر د افغانستان اوسنی حکومت په رسمیت وپېژني.
