ډونالډ لو: امریکا په  افغانستان کې د ا.ا پر وړاندې د هېڅ وسله والې ډلې ملاتړ نه کوي

د سویلي او منځنۍ آسیا په چارو کې د امریکا متحده ایالتو بهرنیو چارو وزارت مرستیال ډونالډ لو ویلي، په افغانستان  کې د هېڅ ډول وسله والې ډلې ملاتړ نه کوي او هېواد یې غواړي،چې د افغانستان ۴۰  کلنه جګړه پای ته ورسیږي.

ډونالډ لو چې قرغزستان ته د امریکايي پلاوي مشري کوي،له آزادۍ راډیو سره یې په ځانګړې مرکه کې ویلي ،امریکایي چارواکي له طالبانو سره اړیکه لري،خو دا تعامل د دوی د رسمیت پیژندې په مانا نه ده.

هغه زیاته کړه:« امریکا په افغانستان کې د سولې او ثبات ملاتړې ده او برعکس د طالبانو پر وړاندې د راپورته شویو هېڅ ډول وسله والو ډلو ملاتړ نه کوي. طالبان هغه وخت بریا ترلاسه کولای شي،چې په افغانستان کې یو ټول شموله حکومت جوړ کړي.» 

اخوا د سیاسي چارو یو شمېر کارپوهان بیا په دې باور دي،چې امریکا په دې ناسته کې د افغانستان په تړاو دوه واضح پیغامونه وړاندې کړل،چې یو یې په افغانستان کې د بې ثباتی نه غوښتل او د طالبانو حکومت په رسمیت نه پیژندل دي.

دوی وایي،د لویدیځ متحدین هم په دې باور دي،چې د ټول شموله حکومت له رامنځته کېدو پرته به د اسلامي امارت حکومت پر رسمیت ونه پیژني.

د سیاسي چارو کارپوه طارق فرهادي وايي:«امریکا نور په افغانستان کې د بې ثباتۍ غوښتونکی نه دی او د طالبانو حکومت په رسمیت نه پیژني، تر هغې یې چې ټولشموله حکومت نه وي رامنځته کړی. نو تر هغې چې د امریکا لخوا پر رسمیت نه وي پیژندل شوی،د هغوی لویدیځ ملاتړ یې هم پر رسمیت نه پیژني.» 

ځینې نور بیا له  اسلامي امارته غواړي،چې د ټول شموله حکومت په تشکیل کې دې هغو ملي څېرو ته ځای ورکړي،چې ملي ګټو ته ژمن دي او جګړه غوښتونکي نه دي.

د پوځي چارو کارپوه توریالی ځاځی وايي:« نهه ماشتې کیږي،چې نړیوال دا غوښتنې کوي،خو طالبانو بابیزه ګڼلي دي. همدا لامل دی،چې د افغاستان سیاسي کړکیچ روان دی. که طالبان د نړیوالو غوښتنې ونه مني او په افغانستان کې یو ټولشموله حکومت جوړ کړي چې په هغه کې ملي او په هېواد منلې څېرې وي،نه جنګ غوښتونکې څیرې.» 

افغانستان کې د وسله‌ والو ډلو بحث داسې مهال راپورته کیږي،چې اسلامي‌امارت تل ډاډ ورکړی دی،چې دلته هېڅ ډول وسله‌ وال مخالفت ته اجازه نه ورکوي او دا ډول ډلې به خپلو موخو ته ونه رسیږي.