Skip to content
د افغانستان اسلامي امارت د بهرنيو چارو وزارت د ملګرو ملتونو د اميت شورا هغه پريکړه ستايلې،چې له افغانانو سره د بشري مرستو په دوام او د افغانستان د بانکې او مالي سيستم د بیا رغولو په تړاو يې کړې وه.
د یاد وزارت له لوري په خپره شوې خبرپاڼه کې دغه پرېکړه له افغانانو سره د روان بشري وضعيت لپاره اړينه او غوره کړنه بلل شوې ده.
دغه راز په خبرپاڼه کې بیا د امريکا له محتده ايالتو غوښتنه شوې ده،چې د افغانستان ګنګل شوې شتمنۍ دې آزاده او شته اقتصادي محدوديتونه دې لرې کړي.
د خبرپاڼې یوه برخه:« د افغانستان اسلامي امارت د بهرنیو چارو وزارت د افغانستان د بانکدارۍ او مالي سیستم بیارغول او له افغانانو سره د بشري مرستو په اړه د ملګرو ملتونو د امنیت شورا د پرېکړې هرکلی کوي. د امريکا پر متحدو ايالاتونو يو وار بيا غږ کوي،چې د افغانستان کنګل شوې شتمني پرته له کوم قيد او شرطه آزاده او هر ډول اقتصادي محدوديتونو لرې کړي.»
په ورته وخت کې بهرنيو چارو وزارت د افغان ښځو د حقونو او حجاب په تړاو د امنيت شورا انديښنې ناسمې ګڼلي او د افغان مېرمنو او نجونو حقونو او زده کړو په برخه کې یې پر خپلو ژمنو ټینګار کړی دی.
د خبرپاڼې یوه برخه:« د افغانستان اسلامي امارت د بهرنیو چارو وزارت د افغان ښځو د حقوقو په اړه د امنيت شورا په خبرپاڼه کې ذکر شوې اندېښنې له واقعيته لرې بولي او د افغانانو د منل شویو دیني او کلتوري لارښوونو په چوکاټ کې د ښځو، ماشومانو او لږکیو د بشپړو حقوقو د تأمین په برخه کې پر خپله ژمنه یو ځل بیا ټینګار کوي.»
د اسلامي امارت د ویاند مرستیال انعام الله سمنګانی بیا وايي، دوی د ښځو او نجونو اړوند ټولو حقوونو ته ژمن دي او هيڅکله يې د صلب کولو اراده نه لري او هڅه کوي، په دې اړه شته خنډونه او ستونزې حل کړي.
بهرنيو چارو وزرات درې ورځې وروسته په داسې حال کې د امنيت شورا د انديښنو په اړه خبرپاڼه خپروي،چې يادې شورا د غړو هېوادونو په ناسته کې د افغان ښځو او نجونو د حقونو په اړه ژوره انديښنه ښودل شوې وه،چې افغان ښځې د کار او زده کړو کولو له حق محرومې دي.
