د ځوانانو ترمنځ د مطالعې لېوالتیا کمېدو د کندهار کتاب پلورنځیو بازار تر بل هر وخت سوړ کړی.
په دې ورځو کې د پخوا په پرتله د کتاب اخستونکو شمېر د پام وړ کم شوی او کتاب پلورونکي د پېرېدونکو له نه لرلو شکایت کوي.
کتاب پلورونکی میرویس وايي: « پخوا ښه وو، کتابونه خرڅېدل او خلکو مطالعه کوله، خو اوس په سلو کې پنځوس کم شوي، مشتریان نه شته او څوک د کتاب مطالعې ته وخت نه ورکوي. ډېری ځوانان په ګېمونو او خواله رسنیو بوخت دي؛ ځکه زموږ مشتریان کم شوي.»
کتاب پلورونکی بشیراحمد وايي: « له دې وړاندې زموږ پښتو او د مطالعې نور کتابونه ډېر زیات خرڅېدل، یعنې له هرو سلو کتابونو ۹۰ هغه خرڅېدل. ویلی شم چې اوس دا فیصدي ۳۰ ته راښکته شوې؛ له دولت غوښتنه کوو چې خلک د کتاب مطالعې ته وهڅوي.»
له ټولنیزو رسنیو ډېره استفاده او په دې برخه کې د ځوانانو تر ډېره بوختیا دوی له کتابي مطالعې را ګرځولي.
د ښوونیزو چارو پوهان د کتاب مطالعې برخه کې مور اوپلار هم مسوول بولي او وايي، والدین باید خپل اولادونه کتاب لوستنې ته وهڅوي او زمینه ورته برابره کړي.
کندهار کې د ښوونیزو چارو فعال عبدالمتین صالح وايي: « دلته میندې او پلرونه د خپلو اولادونو پوښتنه نه کوي او نه ګوري چې دوی په ټیلفونونو کې څه ګوري. زموږ ډېری ځوانانو د مطالعې وخت د فلمونو کتلو او ګېم وهلو ته ورکړی. باید په دې اړه عامه پوهاوی وشي، د تعلیم کچه لوړه شي او هرڅوک په زده کړو بوخت شي.»
په ورته مهال، د کندهار اطلاعاتو او فرهنګ ریاست مسوولین وایي، د مطالعې فرهنګ د ودې لپاره يې د کتابونو د نندارتونونو په ګډون بېلابېل پروګرامونه په پام کې نیولي.
د کندهار اطلاعاتو او فرهنګ ریاست کې د فرهنګ او هنر آمر عبدالشکور څپاند وايي: « موږ په راتلونکي کې د کتاب نندارتونونو جوړولو په ګډون، یو شمېر پروګرامونه لرو. همدارنګه، په پلان کې ده چې په ولسوالیو او کلیو کې هم کتابتونونه جوړ کړو، ترڅو ځوانان د مطالعې په ارزښت پوه او د کتاب لوستلو ته مخه کړي.»
د یادونې وړ ده چې د یوې تازه سروې له مخې، له ۵۰ سلنې څخه ډېرو ځوانانو ویلي چې په وروستیو کلونو کې یې د مطالعې لېوالتیا کمه شوې او د ټولنیزو رسنیو پراخه کارونه د کتاب لوستلو څخه د دوی د لرې کېدو یو مهم لامل دی.
