اسلامي امارت د هېواد پر درېیو ولایتونو د پاکستان پوځي رژیم د چهارشنبې شپې هوايي بریدونه ستر بشري جنایت بللی او وايي، پاکستان په دغو بریدونو سره نه یوازې هوايي حریم نقض کړی بلکې د افغانستان پر خپلواکۍ یې تېری هم کړی.
د پاکستان د پوځي رژیم جیټ الوتکو چهارشنبې شپه په خوست، پکتیکا او کونړ ولایتونو کې د ملکي وکړو کورونه بمبار کړي چې په کې ۱۱ماشومان، یوه ښځې او یو سړی شهیدان شوي دي.
د اسلامي امارت ویاند ذبیح الله مجاهد وايي، په دې بریدونو کې شاوخوا ۱۴ نور کسان ټپیان شوي هم دي.
د اسلامي امارت ویاند زیاته کړې: « د دې بریدونو قربانیانو کې ۱۱ ماشومان، یوه مېرمن او د پاخه عمر یو کس شامل دي. په همدې ډول، په بریدونو کې د ښځو او ماشومانو په ګډون ۱۴کسه نور ټپیان شوي هم دي. موږ په سختو ټکو سره دا بشري جنایت او د تېري عمل غندو.»
بله خوا، د هېواد پخواني ولسمشر حامد کرزي هم پر اېکس پاڼه په یوه پیغام کې د پاکستان د پوځي رژیم له لوري د افغانستان د هوایي حریم نقض او د ښځو او ماشومانو په ګډون د ملکي وګړو وژل په سختو ټکو غندلي.
حامد کرزي په دې پیغام کې پاکستان ته ګوت څنډنه کړې او ویلي دي چې د افغانستان او سیمې په وړاندې د خپلو ناسمو سیاستونو سره کوم څه نه شي ترلاسه کولی.
پخواني ولسمشر زیاته کړې: « د پاکستان ګټې په دې کې نغښتې دي چې د افغانستان پر وړاندې د جنګ او تباهۍ له سیاسته لاس په سر شي. پاکستان باید د دغو پالیسو پر ځای له افغانستان سره د یوه ښه ګاونډي په توګه متمدنې اړیکې وپالي.»
په همدې حال کې د بشري حقوقو نړیوال بنسټ بیا هم په دې ډول بریدونو کې د ملکي وګړو په خوندیتوب ټینګار کړی او په دې برخه کې یې هر ډول بې پروايي له نړیوالو بشري قوانینو سرغړونه بللې.
له دې سره، یاد بنسټ له ملګرو ملتونو، د جرمونو له نړیوالې محکمې او نورو همکاره سازمانونو غوښتي چې د پاکستان پوځي رژیم د تېرې شپې بریدونه دې په جدي توګه وڅېړي.
د بشري حقوقو نړیوال بنسټ د اعلامیې یوه برخه کې راغلي: « موږ په بېړني ډول د ملګرو ملتونو د بشري حقونو شورا، د نړیوالې جنایي محکمې په ګډون د اړوندو نړیوالو او سیمه ییزو بشري حقونو مکانېزمونو څخه غوښتنه کوو چې دا پېښې وڅېړي، د ملکي وګړو د زیان شواهد ثبت کړي او مسوول کسان حساب ورکونه باوري کړي.»
دا لومړی ځل نه دی چې د پاکستان پوځي رژیم د افغانستان فضایي حریم نقضوي او د ملکي وګړو پر کورنو بمباري کوي بلکې تر دې مخکې یې هم لسګونه ځله د افغانستان هوايي حریم نقض کړی او سلګونه ملکي وکړو ته یې مرګ ژوبله اړولې.
د تېر زېږدیز کال د اکټوبر میاشت کې له هغه وروسته چې د کابل او اسلام اباد اړیکې خړې شوې او د دواړو لورو ترمنځ د ډیورنډ فرضي کرښې په اوږدو کې نښتې پیل شوې، د پاکستان پوځي رژیم څو څو وارې د افغانستان هوايي حریم نقض کړ او د ملکي وګړو کورونه یې بمبار کړل.
په دې بمباریو کې په ګڼ شمېر بې ګناه ملکي افغانان چې ښځې او ماشومان په کې شامل وو، شهیدان شوي او ګڼو نور ټپیان شوي دي.
په ورته مهال، له ۱۰۰ زرو زیات کسان د خپلو کورنو پرېښودلو ته اړ شوي دي.
