ډاکټره ماه نور د کویټې په ملکي روغتون کې د جراحۍ برخې خدمتگاره د یوه مشکوک کس له خوا داسې مهال تر برید لاندې راغله چې په خپل کار بوخته وه.
د روغتون سرچینو ویلي، په دې پېښه کې د ډاکټرې ماه نور د بدن اویا سلنه برخه په تېزابو سوځېدلې ده.
د دغو سرچینو په وینا، مشکوک کس پر ډاکټرې ماه نور باندې د تېزابو له برید وروسته له روغتون څخه وتښتېد، خو د دوی په خبره، وروسته پولیسو ورته ویلي چې مشکوک کس له دوی سره په نښته کې وژل شوی.
د ډان ورځپاڼې راپور په یوه برخه کې راغلي: « مشکوک کس پر ډاکټرې د تېزابوله اچولو وروسته له روغتون څخه وتښتېده، پولیسو وویل چې دا کس هغه مهال له پولیسو سره په نښته کې ووژل شو چې د یوه بس له لارې یې د تېښتې هڅه کوله.»
د روغتون سرچینو زیاته کړې، پولیسو ورته ویلي چې ځان تسلیم کړي،خو هغه د تسلیمېدو په ځای پر پولیسو ډزې کړې او د پولیسو په ځوابي ډزو کې وژل شوی.
دا په داسې حال کې د ه چې نه د روغتون سرچینو او نه هم پولیسو تر اوسه پورې د برید انګیزه ښودلې، خو دومره ویل شوي چې د پېښې په ټولو اړخونو څېړنې پیل شوې دي.
د بلوچستان د کورنیو چارو وزیر ضیاء الله لانګو ویلي، پولیسو له پېښې وروسته سمدستي اقدام وکړ.
بله خوا، د ځوانو ډاکټرانو ټولنې ویلي چې برید د روغتون په انګړ کې غرمه مهال شوی.
راپور کې زیاته شوې: « د دې ټولنې په وینا، مشکوک کس د روغتون کارکوونکی و چې د لفټ چلولو مسوولیت یې درلود. مشکوک کس د ډاکټرې د خونې دروازه ټکولې او د هغې له راوتلو سره یې پرې تېزاب شیندلي.»
د ځوانو ډاکټرانو ټولنې د دې برید لامل امنیتي او اداري غفلت بللی او ورسره جوخت یې د روغتون ډاکټرانو او نور پرسونل خپل کارونه بند کړل او لاریون یې پیل کړ.
یادې ټولنې د روغتیا سکرټر او د روغتون د امنیت مسوول د لرې کولو غوښتنه وکړه او خبرداری یې ورکړ چې که اقدام ونه شي نو سخت اعتراضونه به پیل کړي.
