Skip to content
پر اسلامي امارت د ښځو حقونو د نقض په تړاو د نړیوالو اندېښنو پر دوام د افغانستان د بشري حقونو خپلواک کمېسیون لغوه کولو پرېکړې د بشري حقونو نړیوال مدافعین اندېښمن کړي او دا یې د افغاني ټولنې او افغانستان مدني ټولنې لپاره ستر شاته تګ بللی دی.
د افغانستان بشري حقونو خپلواک کمېسیون که څه هم د اسلامي امارت له واکمنۍ راوروسته بند وه،خو د اسلامي امارت د مشرتابه تازه فرمان له مخې،له حکومتي تشکیلاتو اېستل شوی او رسما لغوه اعلان شوی دی.
د ملګرو ملتونو د بشري حقونو عالي کمیشنرې مېشل بېچلټ په یوه خبرپاڼه کې پر دې پریکړې اندېښنه ښودلې او ویلي یې دي،چې یاد کمېسیون د افغانانو د بشري حقونو په خوندیتابه کې کلیدي رول لوبولی دی.
بېچلټ زیاته کړې:« د طالبانو له خوا د افغانستان بشر حقونو سازمان لغوه کولو پرېکړې ډېره ناهیلې کړمه. د افغانستان د بشر حقونو خپلواک کمېسیون په تېرو کلونو کې خورا اړین کارونه کړي دي،چې د انسانانو له حقونو سربېره یې د جګړې د دواړو خواوو قربانیانو له حقونو دفاع کړې ده.»
د بېچلټ ترڅنګ د افغانستان لپاره د ملګرو ملتونو ځانګړي راپورتر هم پر یادې پریکړې اندېښنه ښودلې او په یوه ټویټر پیغام کې یې ویلي، د افغانستان له چارواکو سره به په دې تړاو خبرې وکړي.
بېچلټ هم ویلي،کابل ته یې د سفر پر مهال د اسلامي امارت له چارواکو سره د بشري حقونو یو خپلواک میکانیزم پر جوړولو خبرې کړي دي،تر څو خلک ورته خپل شکایتونه ثبت کړلی شي.
هغې زیاته کړې:« د بشر حقونو عالي کمیشنري د بشر حقونو مدافع او د ملګرو ملتونو بشري ادارو باوري متحد دی،چې له لاسه ورکول یې د ټولو افغانانو او افغانې مدني ټولنې لپاره لویه ضایع ده. ما کابل ته د خپل سفر پر مهال له اوسني واکمنانو سره د بشر حقونو خپلواک میکانیزم پر جوړولو خبرې کړي دي.»
د اسلامي امارت مشرتابه له خوا د بشر حقونو خپلواک کمېسیون په ګډون، پر اساسي قانون د څار کمېسیون،د مشرانو جرګې دارالنشاء، د ولسي جرګې دارالنشاء، د ملي روغې جوړې عالي
شورا او ملي امنیت شورا هم لغوه اعلان شوي دي.
اسلامي امارت د یادو ادارو په تړاو ویلي،له دې وروسته ورته اړتیا نه لیدل کېده او د ۱۴۰۱ کال بودیجه کې ورته برخه هم په پام کې نه وه نېول شوې،چې له امله یې لغوه اعلان شوي دي.
