دوی وايي، که دولت د شفتالو بڼوڼه لا ډېر کړي، پر کور دننه به یادې مېوې په برخه کې اړتیا پوره شي.
د شفتالو یو تن بڼ لروونکی وايي:« کله چې د شفتالو حاصل وخت پيل شي، وخت یې ډېر کم وي.نو د دې لپاره وکولای شو، شفتالو وساتلی شو، بازار کې ښه پایله ورکړي، له حکومته مو غوښتنه دا ده،چې سړې خونې راته جوړې کړي.»
د شفتالو یو بل بڼ لروونکی بیا وايي:« ستونزې ډېرې دي، خو تر اوسه پورې چا راسره مرسته نه ده کړې. دلته په کونړ کې د درملو کیفیت خراب دی. له موږ سره که دولت همکاري وکړي او درمل راکړي، دا بوټي له مرضونو خلاص شي او حاصل به یې ښه شي.»
کونړ ته له نورو سیمو راغلي سوداګر وایي،د دې کال میوه ښه ده،خو پر کوردننه مناسب بازار نه لري،چې له امله یې د ګټې دومره تمه نه کېږي.
دوی وايي، که سرحدي لارې پرانېستل شي، کولای شي،د کونړ شفتالو نورو هېوادونو ته یوسي او پر لوړه بیه به یې وپلوري،چې هم به دوی او هم به بڼ لروونکو ته یو څه پر لاس ورشي.
د شفتالو یو تن سوداګر و ايي:« له موجوده حکومته مو غوښتنه دا ده،چې شفتالو ته د مارکیټ پیدا کولو په برخه کې کار وکړي،ترڅو کومې میوې چې دي، بهر ته ولېږدول شي. دا بندرونه چې اوس مهال تړل شوي، باید د خلاصولو لپاره هڅې وشي.»
له باغونو د شفتالو د راټولولو او نورو اړوندو کارونو لپاره د کونړ په باغونو کې ګڼو خلکو ته د لنډې مودې لپاره د کار زمینه هم برابره شوې.
خلک وايي، خوښ دي،چې پر کور دننه کار کوي او د نورو خلکو له احتیاج خلاص دي،خو پر وینا یې که شفتالو ته ورته د نورو میو باغونه جوړ شي،د دوی کارونه به دایمي شي.
د شفتالو په بڼونو کې یو تن کار کوونکی وايي:« زه دلته دغه بڼ ته راغلی یم. دا ډېر ښه بڼ دی، کولای شو، چې یو څو روپۍ وګټو. له نورو ځوانانو مو هم دا غوښتنه ده،چې راشي دلته کار وکړي. خدای دې کونړ کې بڼوڼه نور هم ډېر کړي، ترڅو د خلکو کار روان شي.»
د خلکو په خبره پراخه دښتې همداسې پاتې دي،که د اوبو زمینه ورته برابره شي او باغونه په کې کېنول شي ،له یوه لوري به کرنه پیاوړې او له بل لوري به زرګونو کسانو ته د کار زمینه برابره شي.
