د ملګرو ملتونو امنيت شورا په روانه جون مياشت کې د افغانستان په اړه دوه ناستې کوي.
کابل کې د دې سازمان مرستندویه ماموريت(يوناما) وايي، لومړۍ ناسته به راتلونکې دوشنبه د جون په اتمه وشي چې په کې به د افغانستان وضعيت په اړه امنيت شورا معلومات وړاندې شي.
د يوناما د معلوماتو له مخې، ټاکل شوې د امنيت شورا دويمه ناسته د روانې جون په ۱۶ مه نېټه ترسره شي او د اجنډا لویه موضوع به يې په افغانستان کې د ملګرو ملتونو سیاسي استازولۍ یا يوناما ماموريت نوي کولو په اړه پرېکړه وي.
د امنيت شورا له لوري په تېر کې هم د افغانستان په اړه ځانګړې ناستې شوې چې په کې د يومانا له لوري د افغانستان روان وضعيت په اړه معلومات وړاندې شوې.
دا په داسې حال کې ده چې روسیې د افغانستان لپاره د یوناما ماموریت د غځېدو ملاتړ کړی. د افغانستان په چارو کې د روسیې ځانګړي استازي ویلي، د یوناما ماموریت به د «ځانګړو شرایطو» له مخې وغځول شي. د ضمیر کابلوف په خبره، د یوناما د جوړښت او فعالیت په اړه پوښتنې شته چې باید ځواب شي.
