د افغانستان پخواني ولسمشر حامد کرزي غوښتل،چې د متحده عرب اماراتو د دولت رئیس د فاتحې په مراسمو کې د ګډون لپاره اماراتو ته سفر وکړي،خو له تګ پاتې شوی دی.
حامد کرزي ته نږدې کس شهزاده مسعود وايي،پخواني ولسمشر په همدې موخه چې متحده عربي اماراتو ته سفر کوي،بهرنیو چارو وزارت ته لیک لیږلی و،خو په خبره یې د بهرنیو چارو وزارت ورته دتګ او یا هم نه تګ ځواب ورنه کړ،چې له امله یې کرزی له سفر پاتې شوی دی .
مسعود هغه اوازې هم ردوي،چې ګواکې پخوانی ولسمشر حامد کرزی دې له هوايي ډګره راګرځول شوی وي.
مسعود زیاته کړه:«د افغانستان پخواني ولسمشر حامد کرزي غوښتل،چې د اماراتو د رئیس دولت د فاتحې مراسمو کې ګډون وکړي او دهغه کورنۍ ته تسلیت ووايي. سره له دې چې د هغه د تګ راتګ ټول ترتیبات د اماراتو د سفارت له لوري نیول شوي وو او په عین زمان کې بهرنیو چارو وزارت ته یې یاداشت هم لیږلی و، اما د دغه یاداشت ځواب تر ډېر وخته پورې مالوم نه شو،چې بالاخره دی له سفر پاتې شو،اما دا چې ځینو رسنیو ویلي،دی له هوايي ډګره بیرته راوګرځول شو،دا خبره هیڅ اساس نه لري او هغه له خپل دفتر وتلی هم نه دی.»
د افغانستان اسلامي امارت د بهرنیو چارو وزارت هم همدومره وايي،کرزی هوايي ډګر ته نه و تللی اوس په خپل کور کې خپلې چارې سمبالوي.
د یاد وزارت د ویاند مرستیال ضیاء احمد تکل وايي:« زما د مالوماتو مطابق کرزی بیخې هوایي ډګر ته نه دی تللی. کرزی په خپل کور کې دی او خپلې چارې مخته وړي.»
