په سویل پکتیا ولایت کې د پوهنتون یو شمیر ښځېنه زده کړیالانې وايي، د حجاب په اړه د د افغانستان اسلامي امارت د امر بالمعروف او نهی عن المنکر وزارت له وروستۍ پریکړې هرکلی کوي.
دوی وايي، حجاب د ا سلامي امارت نه بلکې یو الهي امر دی،چې مسلمانې ښځې یې په مراعت کولو مکلفې دې او ۹۹ سلنه افغان ښځې حجاب مراعت کوي او دا کومه نوې خبره نه ده.
د پکتیا پوهنتون یوه زده کړیاله وايي:« حجاب په اسلام کې مهم امر دی،موږ دا منلی دی. موږ دا د ا سلامي امارت امر نه ګڼو، دا الهي حکم دی او موږ د الله ج لپاره حجاب کوو.»
د پکتیا پوهنتون یوه بله زده کړیاله بیا وايي:« ۹۹ سلنه افغان میرمنې حجاب لا له وړاندې مراعت کوي، یوازې یو سلنه یې مخالفې دي. زما په فکر دا د اسلامي امارت امر نه بلکې دا الهي امر دی او موږ یې باید مراعت کړو.»
د پکتیا پوهنتون ښځېنه زده کړیالانو همدا راز پر کورد ننه او بهر هغه ښځې وغندلې،چې ظاهر د حجاب په مخالفت ولاړې دي او د شخصي موخو لپاره ترې ګټه پورته کوي.
