هرات کې د زرقي محلولونو د تولیدي فابریکو له ډلې، یوې له کلونو راهیسې په هرات صنعتي ښارګوټي کې د درې میلیونه امریکايي ډالرو په لګښت فعالیت پیل کړی.
د دې فابریکې مسوولین وایي، هره ورځ ۴۰ بېلابېل ډوله درمل او۶۰ زره سېرومونه تولید او بازار ته وړاندې کوي.
د درملو تولیدي کارخونې رییس محمد رضا عالمي وايي: « له هماغه پیل څخه باید کیفیت لوړ وي، ځکه که چېرې کیفیت ټیټ وي، د ناروغانو د مړینې سبب کېږي. د کمیت په اړه باید ووایم چې موږ په پیل کې له یوه قلم درملو تولید څخه پیل وکړ، خو دا مهال شاوخوا ۴۰ قلمه درمل او سېروم تولیدوو. موږ د خپلو تولیداتو په نوملړ کې د انټي بیوټیکو تولید هم ور زیات کړی.»
د درملو تولیدي شرکت اجراییوي رییس جعفر سعادت وايي: « موږ په دوو تولیدي کرښو کې هره ورځ شاوخوا ۶۰ زره سېرومونه تولیدوو. موږ د خپلو خامو موادو ډېره برخه له چین څخه واردوو؛ ځکه هم یې کیفیت ښه دی او هم د نورو هېوادونو په پرتله ارزانه دي. ځینې خام مواد له ترکیې څخه هم واردوو.»
هرات کې د درملو تولیدونکو کارخونو کې ډېری لوستي کسان په کار بوخت دي. یوازي په همدې یوه کارخونه کې تر ۲۵۰ زیاتو کسانو ته په مستقیم ډول د کار زمینه برابره شوې ده.
کارکوونکي یې وایي، خوښ دي چې د هېواد دننه ورته د کار مناسب شرایط برابر شوي او له پانګوالو غواړي چې د دې ډول نورو تولیدي فابریکو پر جوړولو هم پانګونه وکړي.
د درمل تولیدونکې کارخونې کارکوونکی حافظ وايي: « دوه کاله کېږي چې زه دلته د درملو په بسته بندۍ کې کار کوم، زه له خپل کار راضي او له پانګوالو غواړم چې خپلو ځوانانو ته د کار زمینه برابره کړي.»
یو بل کارکوونکی انیس ګل حیدري وايي: « زه د تولید شویو درملو د ټېسټ په برخه کې کار کوم. موږ هر هغه درمل بیا ځل چک کوو چې کله له تولید څخه راووځي.»
له بلې خوا، د هرات صنایعو او کانونو خونې مسوولین وایي، که څه هم په بازار کې د پاکستاني درملو بندیز د هرات د درملو تولیدوونکو فابریکو پر تولید مثبت اغېز کړی، خو لاهم د کورنیو درملو تولید د بازار اړتیا نه پوره کوي او هڅې روانې دي چې له ګاونډیو هېوادونو څخه باکیفیته درمل وارد او کورنۍ اړتیا پرې پوره شي.
د هرات صنایعو او کانونو خونې رییس محمد ناصر امین وايي: « دا مهال هم د پخوانیو فابریکو تولید زیات شوی او هم نوې فابریکې جوړې شوې دي، خو لاهم د ټول هېواد لپاره کفایت نه کوي. موږ اوس د پاکستاني درملو بدیل درمل موندلي او له نورو هېوادونو څخه ښه کیفیت درمل واردوو.»
د هرات صنعتي ښارګوټي کې شاوخوا ۱۵۰ زره کسان په کار بوخت دي خو ډېری هغه یې د ټیټو معاشونو شکایت کوي او وایي، ټیټ معاشونه یې د کورنیو اړتیاوي نه پوره کوي.
