د کورنیو چارو وزارت د نشهيي توکو پر وړاندې مبارزي معنیت کابل کې د لوي اختر رانږدې کېدو په مناسبت له سلګونه بېوزله کورنیو سره نغدې مرستې وکړې.
چارواکي وايي، یادې مرستې هغو کورنیو ته ورکوي چې له دې وړاندې يې غړیو په واټونو کې له خلکو خيرات غوښت. دوی وايي، شاوخوا ۳۵ زره سوالګر يې راغونډ کړي چې په کې د ځينو کړيو له لوري روزل شوي حرفوي سوالګر هم شامل دي.
د کورنیو چارو وزارت د نشهيي توکو پر وړاندې مبارزې معين عبدالرحمن منير وايي: « نن ورځ شپږ سوه تنو ته پنځه پنځه زره افغانۍ وېشل کېږي. دا لړۍ له ډېرې پخوا را روانه ده او له دې وروسته به هم روانه وي.»
د کورنیو چارو وزارت چارواکي دغه راز وايي، اوس هم د سودالګرو له منځه مستحق پېژندل شویو کسانو ته هره میاشت د حکومت له خوا پیسې ورکول کېږي، ترڅو د خپلو کورنیو لومړنۍ اړتیاوې پرې پوره کړي.
په ورته مهال، مرسته اخیستونکي له خيرات غوښتلو د راګرځېدو له امله خوښ دي او وايي، د حکومت پر پيسو يې په نسبي توګه اقتصادي ستونزې حلېږي، خو له نړيوالو مرستندويانو د لا زياتې مرستې غوښتنه کوي.
مرسته اخستونکی سید ګل وايي: « دلته راغونډ کسان ټول بېوزله او غریبان دي. له دوی سره باید ډېرې مرستې وشي.»
مرسته اخستونکی جمعه خان وايي: « موږ دلته راغلي یو چې مرسته واخلو. اسلامي امارت له غریبانو سره مرسته کوي.»
په ښارونو کې اوس هم د حکومت له خوا د سوالګرو ټولولو لړۍ دوام لري، خو غوښتنې دا دي چې اسلامي امارت دې خلکو ته کاري فرصتونه برابر کړي، ترڅو له مجبورۍ سوال ته اړ کېدونکي پر کار بوخت شي.
