د خبرپاڼې یوه برخه:« د پاکستاني طالبانو تحریک په هېڅ صورت د تعلیم خلاف نه دي، بلکې موږ تعلیم د وخت یوه مهمه اړتیا هم ګڼو. موږ دا سپیناوی هم اړین بولو چې د پاکستاني طالبانو تحریک د مشرتابه په ګډون د تحریک اکثریت غړي پر دیني علومو سربېره په عصري علومو هم سمبال دي؛ ځکه خو د زدهکړو پر اړتیا او ارزښت ښه پوهېږي.»
ټيټيپي د پاکستان پر استخباراتي ادارو تور پورې کړی چې د دوی پر ضد داسې تبلیغات مخته وړي چې ګنې دوی د ښوونځیو خلاف دي.
د خبرپاڼې له مخې، د پاکستان استخباراتي ادارې هڅه کوي چې له دې لارې ټيټيپي بدنام او ورسره د جګړې لپاره له نړيوالو بسپنه راټوله کړي.
د خبرپاڼې یوه برخه:« د دوی یوازینی هدف دا دی چې طالبان بدنام کړي او پر نړیواله کچه د دې جګړې په پلمه ډالر ترلاسه کړي. دا هم باید ووایو چې د پاکستاني طالبانو تحریک له لوري د ایجوکېشن ډیپارټمنټ یا ریاست معارف په نوم یوه اداره هم شتون لري چې د سلګونو مسوولینو تر څار لاندې يې ګڼې تعلیمي ادارې فعالې دي او زرګونه هلکان او نجونې په کې د دیني او عصري علومو زدهکړې کوي.»
په ټولنیزو رسنیو کې د ټيټيپي پر ضد داسې تبلیغات کېږي چې ګواکي دوی په خیبرپښتونخوا یا په هغو سیمو کې چې واک لري؛ خلکو ته اجازه نه ورکوي چې نجونې او هلکان زدهکړو ته ولېږي.
د سیاسي چارو څارونکي هم مني چې د پاکستان حکومت او پوځ هڅه کوي څو ټيټيپي بدنام او محبوبیت يې ختم کړي.
د سیاسي چارو شنونکی شهسوار سنګروال وايي:« په وروستیو کې د پاکستان پوځ چې کومه ادعا کوي، زه فکر دا د هغوی د بدنامه کولو لپاره یوازې یو اقدام دی، که نه موږ ته معلومه ده چې ټيټيپي د پښتونخوا ډېری سیمې په خپل واک کې لري، خو تر اوسه پورې یې دغه شان ګام نه دی پورته کړی چې کوم ښوونځي ته ورغلي وي.»
د سېشنبې په ورځ د پاکستان جمعیت علمای اسلام ګوند مشر بیا ویلي وو، چې په پاکستان کې هېڅ ډول حکومت نهشته او که وي هم، خو حاکميت يې محدود شوی.
مولانا فضل الرحمن ادعا کړې وه چې د خیبرپښتونخوا په سویلي ولسوالیو کې ټول واک د پاکستان پر ځای له وسلهوالو ډلو سره دی او ولسي خلک د دوی له ډاره ماشومان ښوونځیو ته نه شي لېږلی.
