په پنجشیر ولایت کې د اسلامي امارت ځواکونو او مقاومت ډلې ترمنځ نښتې شوي

له تیرو درې ورځو راهیسې په خواله رسنیو کې د مقاومت جبهې ته منسوبو ادرسونو کې ادعاوې کیږي<چې په پنجشیر کې یې د اسلامي‌امارت پر ځواکونو وسله‌وال بریدونه کړي او تلفات یې ور اړولي دي.

دغې جبهې ادعاوې کړي،چې په کاپیسا او اندراب کې یې هم بریدونه کړي دي، هغه څه چې د کاپيسا ځایي مسوولین یې ردوي.

په کاپیسا کې د اسلامي‌امارت غړو لخوا په خپره شوې ویډيو کې ادعا شوې ده،چې د نظام مخالفینو پرضد یې عملیات پيل کړي او یو شمیر کسان یې نیولي دي.

اسلامي امارت په پنجشیر کې نښتې نه ردوي،خو وایي، یاده ډله یې له زوره غورځولې او بریدګر یې له منځه وړي دي.

د اسلامي امارت د استخباراتو غړی جواد څارګر وايي:« اسلامي امارت هغوی د خپل عمل په سزا رسولي دي. کوم کسان چې نیول شوي، هغه به محاکمو ته سپارل کېږي. موږ هېچ چاته د امنیت مختل کول اجازه نه ورکوو. موږ به د دې هېواد له لوېشت، لویشت  جغرافیې په ډېره کلکه دفاع کوو. هغه کسان،چې امنیت مختل کول غواړي، باید پر دې پوه شي، چې موږ دلته چاته د جګړې او ناامنیو اجازه نه ورکوو.» 

اسلامي امارت وايي، په افغانستان کې جګړې ته کومه پلمه نه ده پاتې، ولسونه له جګړو ستړي شوي او هر هغه څوک چې د اوسني نظام پر ضد بغاوت وکړي،له منځه یې وړي.

په پنجشیر کې ځایي امنیتي مسوولین  بیا د مقاومت جبهې وسله‌والو ته خبرداری ورکوي، چې پرته له دې چې له مخالفت لاس واخلي،هیڅ ځای خوندي نه شي پاتې کیدای.

د یاد ولایت د امنیه قوماندانۍ پخوانی امر عبدالحمید امارتي وايي:« ګرانو هېوادوالو په ځانګړې توګه د پنجشېر اوسېدونکو، خدای تعالی دې هغوی چې د ګمراهۍ خوا ته روان دي،هدایت وکړي. هېوادوالو په وار – وار مو تاسې ته دا پیغام رسولی،چې د اسلامي نظام او حکومت پر وړاندې د پاڅون لپاره هېڅ ډول منطقي دلیل نه شته دی.»  

خو د اسلامي‌امارت ضد جبهه بیا ادعا لري،چې په دره ابشار او دره عبدالله خېلو سیمو کې یې ځينې سیمې نیولي دي.

یاده جبهه وايي:« سره  له دې چې طالبانو پنجشیر ته زرګونه سرتیري رالیږلي،لاهم د مقاومت او طالبانو ترمنځ جګړه روانه ده. په اندراب کې هم جګړه روانه ده او په ترڅ کې یې له ۲۰ زیاتو طالبانو ته مرګ ژوبله اوښتې.» 

دا هغه ادعاوې دي،چې اسلامي‌امارت یې تبلیغات بولي.

د اسلامي امارت د استخباراتو غړی جواد څارګر هغه ادعاوې هم ردوي،چې ګواکې په پنجشیر کې دې ملکیانو سره زور زیاتی شوی وي او یا دې ملکي وګړي وژل شوي وي.

هغه زیاته کړه:« ملت باید ډاډه واوسي،هغه څوک چې مجرم دی، هغه به په خپله سزا باندې رسول کېږي. دلته نسل وژنه نه شته دی، نه قومي جګړو ته لمن وهل شته، یو شی هم نه شته دی. ټول افغانان زموږ وروڼه دي. له هېچ چا سره به د اسلامي امارت ځواکونه زور زیاتی نه کوي.» 

د اسلامي ‌امارت د مخالفې ډلې ویاند علي میثم نظري په یو ټویټ کې ادعا کړې ده،چې له  پنجشیر سربیره یې په خوست، تخار او بغلان کې هم د اسلامي امارت پر ځواکونو بریدونه  کړي او تلفات یې ور اړولي دي، خو اسلامي‌امارت دغه ادعاوې بې اساسه بولي او وايي،دغه ډله یوازې تبلیغات کوي او د خلکو اذهان مخشوش کوي.