Skip to content
د سیاسي چارو یو شمېر کارپوهان په دې باور دي،چې پر کوردننه ځینو وروستیو پریکړو نړۍ بې باوره کړې او له کابل سره یې سیاسي اړیکې اغیزمنې کړي دي.
دوی وايي،له شپږم ټولګي پورته د نجونو ښوونځیو تړل د ښځو او بشري حقونو په برخه کې د نړۍ تمې خلاف حرکتونه د دې لامل شوي دي،چې نړیوال له افغانستان سره د سفیرانو پر کچه رسمي اړیکو ټیګښت نور هم وځنډوي.
کارپوهانو اندیښنه داده،که دغه مسله په همدې توګه دوام وکړي،افغانستان به د اوږد مهال لپاره په نړۍ کې له ګواښوونکې سیاسي انزوا سره مخ وي او قرباني به یې عام افغان ولس وي.
د سیاسي چارو کارپوه طارق فرهادي وايي:« د نجوونو ښوونځي نه دي پرانېستل شوي، د ښځو او بشري حقونه هغه ډول چې تمه یې وه،کار نه دی شوی. دا د دې لامل شوي،چې نړۍ افغانستان سره د سفیرانو پر کچه اړیکو ته زړه نه ښه کوي او په اوږدمهال کې افغانستان یوې ګواښوونکې انزوا خواته بیايي.»
ځینې بیا په سیاسي برخه کې د افغنستان او نړۍ ترمنځ د رامنځ ته شوي واټن لامل په کابل کې د ښې حکومتدارۍ نه وړاندې کول او په دغه برخه کې د نړیوالو هغو شرایطو ته زمینه نه برابرول یادوي،چې د رسمیت پیژندنې لپاره افغانستان ته وړاندې شوي ول.
د سیاسي چارو کارپوه عزیز معارج وايي:«داچې موږ له نړیوالو نه فاصله اخیستې ده،منزوي راغلي یو،ونتوانیدلو،چې له نړۍ سره تعامل وکړو. لامل یې دادی،چې په کابل کې هغه کورنۍ دندې نه دي ترسره شوي،چې اړتیا ورته لیدل کیده. دولت داري او حکومت داري برخو او خدماتو وړاندې کولو په برخه کې پاتې راغلي یو. په ټوله کې طالبانو ته پکار ده،چې چې هغه شرایط چې نړۍ ورته وړاندې کړي دي، باید زمینه ورته مساعده کړي،چې وکولای شو،له نړۍ سره بېرته اړیکې جوړې کړو.»
کارپوهانو وړاندیز دادی،چې افغانو ښځو ته د حجاب د توصیې او د نجونو ښوونځیو د بندیدو پرځای دې لویه جرګه راوغوښتل شي او له لارې دې د نظام نوعیت په ډاګه او له ولس سره په همغږۍ دې د اقتصادي بحران د مخنیوي او اجتماعي ستونزو د حل لپاره لارې چارې ولټول شي.
د مخکینۍ ولسي جرګې غړی کمال ناصر اصولي وايي:« د دې پرځای،چې حجابونو پسي وګرځي،باید په ولس ځان ومني،نوعیت د نظام دې د یوې لویې جرګې له په ترڅ کې معلوم کړي او داسې یوه لویه جرګه،چې ټول افغان ولس په کې شتون ولري، نه یوازې ملایان. له هغې وروسته داسې یو دولت جوړ کړي،چې ولس منلی وي او اجتماعي اقتصادي او امنیتي رفا رامنځ ته کړي،بیا کولای شو،چې له نړۍ سره تعامل ته ورسیږو.»
تر امر ثاني پورې له شپږم ټولګي پوررته د نجونو ښوونځیو له تړلو وروسته اسلامي امارت ښځو ته د اسلامي حجاب د مراعات کولو اعلان کړی دی،چې دغې مسلې پر کور دننه او بهر غبرګونونه راپارولي دي.
له دې وړاندې اسلامي امارت تل په دې ټینګار کړی دی،چې افغانستان د رسمیت پیژندنې لپاره ټول هغه نړیوال معیارونه یې پوره کړي،چې په دغه برخه کې یو هېواد ورته اړتیا لري.
