د افغانستان اسلامي امارت د کورنیو چارو وزارت سرپرست وزیر سراج الدین حقاني وايي، په پام کې لري،چې د سویل ختیځ زون درې ولایتونو، پکتیا، پکتیکا او خوست کې د بدیو او تاوتریخوالي د نورو قضیو مخنیوي په موخه د ولایتي چارواکو پر مشرۍ کمیټې جوړې کړي.
حقاني دغه خبرې د یکشنبې پر ورځ د «۱۴۰۱ کال د غويي پر ۱۸ مه» د پکتیا ګردې څېړۍ ولسوالۍ په سرخېلو سیمه کې د قومي مشرانو په یوې جرګه کې،چې د هغه او کورنۍ له خوا یې له یوې بلې کورنۍ د بښنې په موخه جوړه شوې وه،وکړې.
حقاني د سویل ختیځ زون له والیانو او قومي مشرانو وغوښتل،چې د کورنیو او قومونو تر منځ د شخړو د هواري لپاره دې قومي تړونونه رامنځته کړي.
دغه راز حقاني وویل، والیان او قومي مشران دې د دغه تړونونو له مخې د قومونو او کورنیو تر منځ شخړې هوارې او خلک یووالي ته را بولي .
حقاني وايي:« د الله په خاطر اول په خپلو قومونو کې تاسې قومي مشران او دیني عالمان دا تړونونه رامنځته کړئ،چې لومړۍ لویه پکتیا کې دا دښمنۍ پر دوستۍ بدلوو، بیا به ځو لوګر او نورو ولایتونو ته او هېواد کې به د دښمنۍ تخم ورکوو.»
بلاخره مقابلې کورنۍ د قومي مشرانو پریکړه ومنله او د حقاني له کورنۍ سره یې دښمني په دوستۍ بدله شوه او د دواړو لورو تر پخلا کېدو وروسته یې یو بل ته غېږې ورکړې.
د حقاني کورنۍ غړی انس حقاني وايي:« موږ په دې باندې ویاړو. د الله شکر ادا کوو،چې زموږ په ژوند او وجود دا مسئله د تل لپاره حل شوه. هغې کورنۍ ته موږ په غذر او د دود او رواج له مخې په ننواتې راغلو. دوی زموږ ننواتې قبولې کړې.»
انس حقاني وایي، کورنۍ یې په ټولیز ډول د کورنیو او قومونو ترمنځ د شخړو د هواري نیت لري او نږدې راتلونکي کې به د بلخیلو،صبریو او یو شمیر نورو قومونو شخړې په سوله ییز ډول حل شي.
هغه زیاته کړه:« نږدې راتلونکې به د بلخیلو او صبریو ترمنځ چې کومه شخړه ده،دا به حل کیږي او دلته د سرخېلو او د نکې طرف د کوم قوم تر منځ،چې کومه تاریخي شخړه ده،هغه به هواریږي او دا مسایل به ان شاء الله قدم په قدم حل کېږي.»
د ځمکې پر سر د کورنیو او قومونو تر منځ شخړې لویه پکتیا کې اوږده مخېنه لري،چې ډېری وخت دغه شخړې پر وسله والو نښته اوړي او د دواړو لوریو د مرګ ژوبلې لامل ګرځي.
