د تخار ولایت اړوند سیمو کې د کوکنارو له منځه وړلو کمپاین د دې ولایت امنیه قومندانۍ له نشه یي توکو سره مبارزې مدیریت له خوا پیل شو.
چارواکي وایي، د دې کمپاین په ترڅ کې یې د دې ولایت په بېلابېلو سیمو کې پر شاوخوا دوه زره جریبه ځمکو کرل شوي کوکنار له منځه وړي او دا پروسه لا هم دوام لري.
د تخار ولایت امنیه قومندانۍ کې له نشه یي توکو سره د مبارزې مدیر قاري ذبیح الله هجران وايي: « تر اوسه د تخار په مرکز او شپږو ولسوالیو کې تقریبا ً ۲۰۰۰ جریبه ځمکه له کوکنارو پاکه شوې.»
د دوی په خبره، هغه کسان چې د کوکنارو په کرکیله کې ښکېل وموندل شي، له قانوني چلن سره به مخ اوعدلي او قضایي ارګانونو ته وسپارل شي.
له نشه يي توکو سره د مبارزې مدیر زیاتوي، له دې کار موخه په ټولنه کې د نشهیي توکو د خپرېدو مخنیوی او د خلکو د ژوند خوندیتوب دی.
د تخار ولایت امنیه قومندانۍ کې له نشه یي توکو سره د مبارزې مدیر وايي: « زه له ټولو بزګرانونو غواړم چې حلالو کښتونو ته مخه کړي؛ ځکه چې دا بوټی د ځوانانو د تباهۍ سبب ګرځي او ټولنې ته زیان رسوي. که چېرې څوک له دې کار لاس وا نه خلي، قانوني چلن به ورسره وشي.»
بله خوا، د سیمې یو شمېر اوسېدونکو د یاد کمپاین هرکلی کړی او وایي، د کوکنارو کرکیله د ټولنې لپاره جدي ستونزې رامنځته کوي.
دوی له بزګرانو غواړي چې د کوکنارو پرځای قانوني او ګټور کښتونه وکري، ترڅو د خلکو اقتصاد پیاوړی شي او هم ټولنه له نشهیي توکو پاکه پاتې شي.
د سیمې اوسېدونکی عبدالله وايي: « زموږ په سیمه کې د کوکنارو کښت ډېر نه شته، ځکه دا بوټی حرام دی، ځکه دا شی خلک ناروغوي. زه له خلکو غواړم چې غنم، جوار او نور حبوبات وکري.»
د سیمې اوسېدونکی ابراهیم وايي: « خلک باید له دې وروسته تریاک ونه کري، ځکه ځوانان معتاد کوي. باید مخور او سپین ږیري خلک راټول کړي او ترې وغواړي چې نور کوکنار ونه کري.»
له دې ټولو سره، د سیمې اوسېدونکو ټینګار دا دی چې حکومت دې بزګرانو ته د بدیلو کښتونو لپاره لازمې اسانتیاوې برابرې کړي او کرنیزه برخه کې دې اړین ګامونه پورته شي، ترڅو خلک د کوکنارو کر ته اړ نه شي.
