د پوهنې وزارت دلته د رسنیو د استازو پر وړاندې ۱۰۶۰ خالي بستونه د ازاد رقابت لپاره اعلان کړل چې په کې د ولسوالیو اړوند د پوهنې آمریتونه او په ولایتونو کې تش اداري بستونه شامل دي.
د وزارت د معلوماتو له مخې، دغو بستونو ته د دوشنبې له ورځې وروسته د نوم لیکنې پروسه رسماً پيلېږي چې د استخدام پروسې له بشپړېدو سره به يې د پوهنې په بهیر کې ښهوالی راشي او پر شرایطو برابرو کسانو ته د کار کولو فرصت ورکړل شي.
د پوهنې وزارت چارواکي وايي، د پوهنې بهیر د معیاري کېدو په موخه يې روان کال ځینې د پروګرامونو تطبيق کول په نظر کې نیولي.
د پوهنې وزارت د تنظیم او کیفیت معین عبدالخالق صادق وايي: « روان ۱۴۰۵ هجري لمریز کال د افغانستان اسلامي امارت د پوهنې وزارت په تدریسي چارو کې دری لوی پروګرامونه په پام کې لري.»
د نوموړي په خبره، په ټولو ولایتونو کې يو داسې ښوونځی هم تاسيسوي چې پر شپه غالي یا ليليې سربېره به د درسي سيسټم پر اړوند عصري وسايلو هم سمبال وي.
په ورته مهال، نور چارواکي وايي، یادو بستونو ته فوق بکلوریا(۱۴ فارغ) لیسانس (۱۶ فارغ) کسان د نوماندانو په توګه نومليکنه کولی شي.
د پوهنې وزارت د کارکوونکو چارو ریيس شفیعالله منصور وايي: « د ښارونو د پوهنې اړوند آمریتونو او د کابل ښار د تعلیمي حوزو اړوند بستونو لپاره چې کوم متقاضیان شته، کولی شي د اړوند ولایت د کارکوونکو چارو له مدیریتونو څخه غوښتنلیک ترلاسه کړي. د کومو آدرسونو یادونه چې دلته وشوه، هغوی ته له وړاندې څخه د وزارت له خوا غوښتنلیکونه ډیزان او ورکړل شوي دي.»
په ورته مهال، د کار او ټولنېزو چارو وزارت چارواکي وايي، په هېواد کې د بېروزګارۍ کچه زیاته شوې، خو د پوهنې وزارت له تازه اقدام سره به سلګونه کسانو ته د کار کولو فرصت برابر شي.
د دوی په خبره، د بېروزګارۍ کمولو لپاره يې په عامه او خصوصي سکټور کې شاوخوا ۱.۴ ميليونه کسانو ته د کارموندنې هڅې پيل کړې دي.
د کار او ټولنيزو چارو وزارت د کار چارو معین ذاهد احمدزی وايي: « یوازې افغانستان کې نه بلکې په ټوله نړۍ کې د بېکارۍ کچه یو څه لوړه ده. د افغانستان اسلامي امارت له راتګ راهیسې هڅه کوي چې څنګه کولی شي ځوانانو او مستحقو او مستعدو بې روزګاره کسانو ته د کار زمینه برابره کړي.»
د پوهنې وزارت په داسې حال کې د ولسوالیو پوهنې آمریتونه او د ولايتونو په مرکزونو کې اداري بستونه اعلان ته سپاري چې لا هم ځينو ولايتونو کې د ښوونکو کموالي په اړه راپورونه ورکړل شوي.
چارواکي ډاډ ورکوي چې د دې ستونزې د حل هڅې يې پيل کړې دي.
