Skip to content
د کوچني اختر په درېیو ورځو کې د پکتیا اریوب ځاځيو ولسوالۍ سپینې شګې سیمې ته د دغه ولایت له اوسېدونکو سربېره له نورو ولایتونو هم زرګونه سیلانیان ورغلي ول.
سپینې شګه وروستیو کلونو کې د هېواد پر کچه د تفریح په مشهوره سیمه بدله شوې او هر کال اخترونو کې د زرګونه سیلانیانو کوربنه وي.
یو شمیر سیلانیان سپینه شګه د تفریح لپاره مناسبه سیمه یادوي او له هیوادوالو غواړي،چې د تفریخ لپاره ورته ورشي.
یو تن سیلاني وايي:«دلته له نورو ولایتونو خلک راغلي. ټول خلک ترې خوښ دي، د اریوب خلک ډېر میلمه پاله دي. له هېوادوالو مې غواړم،چې دلته د چکر او تفریح لپاره راشي.»
یو بل سیلاني بیا وايي:« د هغو ولایتونو له اوسیدونکو چې تر اوسه دلته نه دي راغلي، باید په چکر راشي، امن دی هېڅ ستونزه نه شته دی، د ساعتیري لپاره ډېره مناسبه سیمه ده.»
د اریوب ځاځيو ولسوالۍ اوسېدونکي وایي، مخکېني حکومت څو ځله ورسره ژمنه وکړه،چې سپنه شګه ملي پارک اعلان کړي، خو پوره یې نه کړه او اسلامي امارت دې په دې برخه کې اقدامات وکړي.
د اریوب ځاځیو ولسوالۍ یو تن اوسېدونکی وايي:«د تیر نظام په وخت کې له خلکو سره څو ځله ژمنې وشوې،چې اریوب به ملي پارک او خوندي سیمه یادوي،خو پوره یې نه کړه. له اسلامي امارته مو غوښتنه ده،چې اریوب ملي پارک اعلان کړي.»
د اریوب ځاځیو ولسوالۍ یو بل اوسېدونکی بیا وايي:« موږ غواړو،چې دلته ملي پارک جوړ شي. د هغو سیمو خلک به هم راشي،چې تر اوسه پورې نه دي راغلي.»
سپینه شګه پر ډیورنډ فرضي کرښه او د سپین غر لمن کې پرته تفریحي سیمه ده او خلک له اسلامي امارت غواړي،چې داسې زمېنه دې برابره کړي،ترڅو د پښتونخوا اوسېدونکي هم دې سیمې ته په چکر راشي.
