Skip to content
د پکتیا ولایت امنیه قوماندانۍ امنیت امر محمد اسلم کرامت وایي، د اختر مراسمو خوندیتوب لپاره جوړه شوې دغه ځانګړې قطعه به شپه او ورځ مرکز ګردیز او څېرمه ولسوالیو کې د امنیت ساتنې دنده ولري.
کرامت وايي،هیڅ ډول امنیتي ننګونې نشته دی،خلک دې په ډاډمنه فضاء کې د اختر خوښۍ ونمانځي او شپه او ورځ پر لویه لارو سفر کولای شي .
کرامت زیاته کړه:« موږ ۱۰۰ کسیزه قطعه جوړه کړې،چې د اختر مراسمو د خوندیتوب لپاره به مرکز ګردیز او ولسوالیو کې ګزمې او چیک پاینټونه فعال کوي او خلک دې په ډاډمنه او خوندي فضاء کې له ویرې پرته د اختر مراسم ونمانځي.»
د اختر مراسمو امنیت ساتنې لپاره د جوړې شوې ځانګړې قطعې سرتیري او د ګردیز د ځېنې سیمو امنیتي مسوولین هم خلکو ته ډاډ ورکوي،چې د اختر خوښۍ دې له کومې وېرې پرته ونمانځي.
د ګردیز ښار درېیمې امنیتي حوزې امر عنایت الله وايي:« دلته زموږ مجاهدین چیک پاینټونه لري. ۲۴ ساعته هر اړخیز مالومات کوي،څه یې چې په وس پوري وي، د ولس ساتنې لپاره یې تر سره کوي.»
د ځانګړې قطعې یو تن سرتیری وايي:« موږ چې دلته په دندو کې یو، خلک دې د اختر مراسم په ډاډمنه فضاء کې ولمنانځي،چکر او سفر ډاډ زړه ترسره کولای شي.»
د پکتیا یو شمیر اوسیدونکي له امنیتي ادارو غواړي ، چې د اختر په شپو ورځو کې دې د عبادت ځایو ، بازارونو او میله ځایونو امنیت ډاډمن کړي ، څو خلک په ډاډه زړه د اختر خوښۍ ونمانځي.
د پکتیا یو تن اوسېدونکی وايي:« له اسلامي امارته غواړو،چې د اختر شپو او ورځو کې د جوماتونو،بازارونو او تفریحي ځایونو امنیت دې ډاډمن کړي،ترڅو کومه پیښه رامنځته نه شي.»
د پکتیا یو بل اوسېدونکی بیا وايي:« د اختر په راتلو سره دې د جوماتونو، بازارونو او سوداګرو امنیت خوندي کړي،لکه څرنګه،چې اوس دی همداسې باید دوام ورکړي،چې خلک په ډاډه زړه د اختر مراسم ونمانځي.»
امنیتي مسوولین وایي،له څو ورځو راهیسې په ګردیز ښار کې د پخوا په پرتله چیک پاینټونه او ګزمې زیاتې شوې او د جوماتونو او د ګڼې ګوڼې نورو ځایونو امنیت خوندي شوی دی.
