په افغانستان کې په نشو روږدي کسان له درملنې وروسته بیا نشو ته مخه کوي چې د روږدو شمېر یې زیات کړی.
افغانستان کې له یوې خوا د روږدو درملنه کیږي او له بلې خوا همدا نسبي روغ شوي کسان بیا نشو ته مخه کوي.
نشو ته د روږدو کسانو بیا ګرځیدل له دې امله دي چې نشه يي توکو ته لاس رسی اسانه دی.
روغتیا وزارت په دې تړاو انديښنه ښودلې چې د هر روږدي کس په درملنه اوه سوه ډالر مصرف راځی، خو بازار کې نشه يي توکو ته اسانه لاس رسی دا لګښت په اوبو لاهو کوي.
د کابل ښار لویدیځ لور ته د سرای شمالي سیمه، چرته چې په سل ګونه په مخدره توکو روږدي کسان د ژمي اږدې یخې شپې د شنو لوګیو په پورته کولو تېروي، هغه لوګی چې هر ځل کش سره یې مرګ ته نږدې کوي.
اسماعیل د پروان ولایت اوسیدونکی دی، وايي کورنۍ يې د جګړو پرمهال له لاسه ورکړې او شل کاله کیږي چې په نشه روږدی دی.
فیض محمد بل هغه روږد دی چې د درملنې لپاره وړل شوی، خو په دې پلمه بیرته له روغتون ویستل شوی چې د زړه ناروغي لري او درملنه یې سخته ده.
جاوید دولس کلن روږدی دی چې اوس له یوې اوونۍ راهیسې تر درملنې لاندې دی، جاوید بیا د نشه يي توکو پر ځای روغتون کې له مشکلاتو شکایت لري.
روغتیا وزارت کال کې د اته زره روږدو درملنه کوي، خو په اته زره کسانو کې زیات یې بیرته نشو ته مخه کوي او لامل دا دی چې نشه یي توکو ته لاس رسی اسانه دی.
روغتیا وزارت خپلو امکاناتو ته په کتو د روږدو شمېر زیات یادوي.
د روغتیا وزارت د روږدو د درملنې لپاره په ټول هېواد کې یو سل او اوه مرکزونه لري او اوسمهال پنځه سوه زره روږدي جدي درملنې ته اړتیا لري چې د روغتیا وزارت یې په راټولولو بوخت دی.
