روان کال هرات کې د ډېرو ورښتونو له پلوه یو له هغو کلونو بلل کېږي چې د کرنې سکټور لپاره یې نوې هیلې راټوکولې دي.
د بارانونو زیاتوالي نه یوازې د وچکالۍ اندېښنې راکمې کړې دي بلکې د اوبو زېرمو د پیاوړتیا او د کرنیزو حاصلاتو د لوړوالي لپاره یې هم زمینه برابره کړې ده.
د دغو ورښتونو یوه مهمه پایله د پاشدان بند ډکېدل دي. د یاد بند کاسه دا مهال په بشپړه توګه له اوبو ډکه ده او له دې سربېره ترې درې تر څلور متر مکعب اوبه هم روانې دي چې ډېره برخه یې د کروخ، انجیل او پښتون زرغون ولسوالیو کرنیزو ځمکو ته رسېږي.
د پاشدان بند مسوولین وایي، د اوبو دا کچه کولی شي شاوخوا ۱۳ زره هکټاره ځمکه خړوبه کړي.
د پاشدان بند پروژې مسوول عبدالا قاضيزاده وايي: « له نېکه مرغه د بند پروژې په بشپړېدو سره به ۱۳ زره هکټاره ځمکې خړوبې شي چې ډېره برخه یې د کروخ ولسوالۍ ځمکې دي. همدارنګه په دې ځمکو کې د پښتون زرغون او انجیل ولسوالیو ځینې ځمکې هم شاملې دي. دا مهال له ۳ تر ۴ مترمکعبو اوبوه کانالونو ته خوشي شوې دي او ګڼو کلیو ته وېشل کېږي.»
بله خوا، کروندګر د سږ کال له وضعیت خوښ ښکاري او وایي، د ورښتونو زیاتوالي د غنمو او نورو کښتونو وده چټکه کړې او تمه شته چې سږني حاصلات به د تېرو کلونو په پرتله زیات وي.
د دوی په خبره، که د موسم شرایط همداسې دوام وکړي، نو د کورني تولید کچه به د پام وړ لوړه شي.
کروندګر غلام محمد وايي: « که څه هم نور کښتونه هم لرو، خو موږ سږ کال تر ډېره غنم کرلي؛ ځکه زموږ خلک تر ډېره غنمو ته اړتیا لري. د خدای فضل دی سږ کال د ورښتونو له امله زموږ کښتونه ډېر ښه دي.»
کروندګر محمد یوسف وايي: « سږ کال ښه ورښتونه وشول او له امله یې د غنمو حاصلات ډېر دي. تېرو کالو کې موږ له سختې وچکالۍ سره مخ وو او کښتونه مو نه درلودل.»
کروندګر عبدالاحمد وايي: « سږ کال نه یوازې غنم او نور حبوبات ښه دي بلکې تازه مېوې او باغونه هم ښه دي او ښه بار یې نیولی دی.»
د هرات کرنې، اوبولګولو او مالدارۍ ریاست مسوولین هم اوسنی وضعیت هیله بښونکی بولي.
د هغوی د معلوماتو له مخې، سږ کال د هرات په مرکز کې شاوخوا ۲۵۰ ملي متره او په ولسوالیو کې تر۳۷۰ ملي مترو ورښتونه ثبت شوي چې د اوبو کمښت ستونزه یې تر ډېره حل کړې ده.
د هرات کرنې، اوبولګولو او مالدارۍ ریاست د کرنیزو چارو آمر بشیر احمد احمدي وايي: « تاسو ته معلومه ده چې د للمي غنمو کښت په بارانونو پورې اړه لري. که باران ونه شي موږ للمي نه شو کرلی. سږ کال د کرنې وزارت له خوا په ډېر ښه وخت کې یو شمېر بزګرانو ته د للمي او اوبیزو غنمو تخمونه ووېشل شول او د هغوی له خوا وکرل شول. همدارنګه سږ کال ښه ورښتونه هم وشول او زه باور لرم چې ښه حاصلات به ولرو.»
د مسوولینو معلوماتو له مخې، سږ کال هرات کې ۱۸۰ تر ۲۰۰ زره هکټاره ځمکو باندي غنم او څه باندي ۲۲۰ زره هکټاره ځمکو باندي هم نورې غلې او حبوبات کرل شوي.
