له طبیعي پیښو سره مبارزې لپاره د چمتوالي ملي اداره وایي، د ټرانسپورټ او هوايي چلند وزارت د هوا پېژندنې ادارې خبرداري ته په کتو، له احتمالي پېښو سره مبارزې ته چمتوالی نیول شوی.
د دې ادارې ویاند وايي، دوی په اکثریت ولایتونو کې د خوراکي او غیرخوراکي توکو د خوندي ساتلو لپاره معیاري ګودامونه لري او د پېښو پر مهال د بېړنیو مرستو د ښه مدیریت لپاره له ټولو اړوند ادارو سره همغږي هم شوې ده.
محمد یوسف حماد له خلکو هم غواړي چې د دوی سپارښتنې په پام کې وساتي او له غیر ضروري سفرونو ډډه وکړي.
حماد زیاتوي: « له پېښو سره د مبارزې ملي اداره د تېر په څېر اوس هم پوره چمتوالی لري، په ټولو ولایتونو کې یې معیاري ګودامونه جوړ کړي او له اړوندو ادارو سره همغږي لري. موږ چمتو یو چې د طبیعي پېښو پرمهال د خلکو مرسته وکړو.»
د دې ادارې معلوماتو ته په کتو، د شویو اټکلونو له مخې ممکن دا سېلابونه په شمالي، ختیځو او مرکزي ولایتونو کې چې د ورښت کچه په کې له ۱۰ تر۷۰ ملي مترو اټکل شوې، راووځي.
دا په داسې حال کې ده چې د ټرانسپورټ او هوايي چلند وزارت د هوا پېژندنې ادارې بیا په یادو ولایتونو کې د ورښت اندازه له ۱۰ څخه تر ۳۵ ملي مترو پورې اټکلوي او وايي، ممکن د سېلابونو راوتلو سبب شي.
له طبیعي پېښو سره د مبارزې لپاره د چمتوالي ملي ادارې ویاند وايي: « د هېواد په شمالي، ختیځو او مرکزي ولایتونو کې د راتلونکو څو ورځو لپاره د ورښتونو او سېلابونو راوتلو ستر اټکل شوی. د اټکل له مخې به په یادو سیمو کې د بارانونو کچه له ۱۰ تر ۷۰ ملي مترو وي. له پېښو سره د مبارزې اداره له ټولو هېوادوالو غوښتنه کوي چې له سېلابي لارو، سیندونو او سېلبرونو څخه ځان لري وساتي، د هوا حالاتو او اټکلونو ته پاملرنه وکړي او غیر ضروري سفرونه ونه کړي.»
د هواپېژندې ادارې رییس بیا وايي، په ځینو ولایتونو کې به د اټکل له مخې باران په وقفه یي ډول و ورېږي.
د هغه په خبره، د ورښت سرعت به له یو څخه تر نهه پنځوس کیلومټرو في ساعت او همداراز د ورښت پر مهال به د هوا سرعت نهه پنځوس کیلومټره في ساعت وي.
د ټرانسپورټ او هوايي چلند وزارت د هوا پېژندنې رییس محمد نسیم وايي: « د هوا پېژندنې ریاست خپلو امکاناتو ته په کتو د هېواد په ځینو برخو کې د وقفه يي بارانونو اټکل کوي. ډېری بارانونه به د هېواد په لوېدیځو، شمال لوېدیځو، ختیځو، سوېل ختیځو او مرکزي ولایتونو کې وشي او ښايي سیلۍ او سېلابونه هم له ځانه سره ولري.»
په ورته مهال، د اقتصادي چارو شنونکي بیا سېلابونه په هېواد کې د کرنیزو حاصلاتو د تباهۍ یو لامل بولي او وايي، د خلکو پر ژوندانه ناوړه اغېز کوي.
دوی له حکومت غواړي چې د سېلابونو د زیاتو زیانونو مخنیوي لپاره لازم ګامونه پورته کړي.
د اقتصادي چارو شنونکی عبدالنصیر رښتیا وايي: « د اقلیمي بدلون له امله افغانستان کې د سېلابونو جاري کېدل د دې سبب شوي چې خلکو ته زیان ورسېږي. د افغانستان اکثریت وګړي په کرنه او مالدارۍ بوخت دي او د سېلابونو راوتل په مخامخ توګه د خلکو زراعت او مالدارۍ ته زیانونه اړوي. کله چې د خلکو کرنه او مالداري له منځه لاړ شي، ښکاره خبره ده چې له ډېرو جدي ستونزو سره مخامخ کېږي.»
دا په داسې حال کې ده چې دوې اوونۍ وړاندې هم د هېواد په اکثریت ولایتونو کې درانه ورښتونه وشول او د ګڼو لارو له تخریب او بندولو سربېره یې، یو شمېر سیمو کې د خلکو استوګنیز کورونه، عامه تاسیسات او کرنیزې ځمکې هم ویجاړې کړې.
