فرانس پرېس خبري اژانس ته د امريکا بهرنيو چارو وزارت يوه چارواکي منلې چې په قطر کې امريکا ته د تګ لپاره منتظرو افغانانو په اړه تازه پرېکړه شوې.
په دې پرېکړه کې له يادو افغانانو غوښتل شوي چې یا خپل هېواد(افغانستان) ته ستانه شي او يا هم افریقايي هېواد کانګو ته استول کېږي.
له دې وړاندې يادو افغانانو ويلي و چې قطر کې د امريکا پر اهدافو د ايران بريدونو له امله يې په کمپونو کې له ويرې ډک وضعيت تېر کړی.
د امريکا دا تازه پرېکړه د افغان کډوالو د مدافع بنسټونو له لوري سخته ننګول شوې.
د افغانانو د تخلیې پروګرام(افغان ایواک) مشر شان وان ډیور ویلي: « په دې ۱۱۰۰ کسانو کې ۴۰۰ ماشومان او هغه ژباړونکي هم شامل دي چې له امریکایي ځواکونو سره يې خدمت کړی. اوس د امریکا متحده ایالاتو له خوا کانګو ډیموکراټیک جمهوریت ته لېږدول کېږي، داسې یو هېواد چې خپله له بشري ناورین سره مخ دی.»
د امریکا متحده ایالتونو کانګرېس ځينې غړي هم د امريکا پر دې پرېکړې نيوکې کوي او زياتوي چې په قطر کې امريکا ته د لېږد په تمه له اوږدې مودې منتظرو افغانانو په تړاو شوې پرېکړه غير عادلانه ده، حال دا چې له امريکايي ځواکونو سره د کاري مخینې لرلو له امله بايد موده وړادې انتقال شوي وای.
د امریکا استازو جرګې غړي ټیم ګاین ویلي: « موږ مکلفیت لرو چې خپلې ژمنې تعقیب کړو. له خپلو ژمنو په شا کېدل به مو له نورو سره ملګرتیا رامنځته کول ستونزمن کړي. موږ ملګرتیا ته په راتلونکي کې د خپل ملي امنیت د پرمختګ لپاره اړتیا لرو.»
له بلې خوا، سویډن هم منلې چې په جرمونو کې ښکېلو افغانانو د اخراجولو لپاره د اسلامي امارت له پلاوي سره تخنيکي خبرې کوي. د معلوماتو له مخې، ټاکل شوې دا خبرې له را روان اوړي مخکې بروکسېل ته د اسلامي امارت د یوه پلاوي له سفر وروسته وشي.
د سویډن د کډوالۍ وزیر جوهان فورسل ویلي: « هغه خلک چې سویډن کې په بېلابېلو جرمونو محکوم شوي او یا د سویډن امنیت ته ګواښ پېښوي، له هېواده د هغوی اخراجول زما له لومړیتوبونو څخه دي.»
هممهاله، د ملکرملتونو ځانګړي راپور ورکونکي ریچارډ بېنېټ له اروپا څخه د ځينو افغانانو پر احتمالي اخراج اندېښنه ښودلې او ويلي يې دي چې دغه کار به په افغانستان کې بشري ستونزې لا پسې زیاتې کړې.
د کډوالو د حقونو مدافع عبدالرزاق عدیل وايي: « د سویډن اقدام په اروپا کې د کونسلي یخ ماتولو اقدام و. همدارنګه امریکا هم د توندو سیاسي بیانیو له خپرولو سربېره، په استخباراتي او تخنیکي برخو کې دغو خبرو ته اړتیا لري. احتمال شته چې په راتلونکي کې کانګو ته د انتقال په شان غیر عملي طرحو په ځای، د تفاهم له لارې خپل هېواد ته د افغانانو د ورګرځولو مکانېزمونه رامنځته شي.»
دا هرڅه داسې مهال دي چې له پاکستان او ايران څخه په جبري توګه د افغانانو اخراج دوام لري او د دې ترڅنګ، له ترکيې او جرمني هم څو ډلې افغان کډوال خپل هېواد ته ستانه کړای شوي دي.
په دې کسانو ډېری هغو په کوربه هېوادونو کې د اوسېدو قانوني اسناد نه لرل او له همدې امله يې يادو هېوادونو د بېرته ستنولو پرېکړه کړې.
