یو شمېر بهرنیو رسنیو د خپلو سرچینو په حواله خبر ورکړی چې اروپايي ټولنه غواړي افغان چارواکو ته د ورتګ بلنه ورکړي، ترڅو له اروپايي هېوادونو څخه د افغان کډوالو ستنولو په تړاو خبرې وکړي.
که څه هم افغان لوري ته لا رسمي بلنه نه ده ورکړل شوې، خو ټاکل شوې د اوسني حکومت یوه تخینکي ډله تر راتلونکو څو اوونیو د بلجیم پلازمېنې بروکسېل ته سفر ولري.
د راپورونو له مخې، اروپايي ټولنه په داسې پلان کار کوي چې له مخې یې هلته په ناقانونه توګه مېشت شوي او هغه افغانان بېرته افغانستان ته ستانه کړي چې په جرمونو کې ښکېل وي.
د سرچینې په خبره: « پلان دا دی چې دا تخنیکي ډله له اوړي وړاندې را وبلل شي.»
د معلوماتو له مخې، افغان چارواکو ته دا بلنه د اروپايي کمیسیون او ټولنې د غړیو هېوادونو په همغږۍ او افغانستان ته په دې اړه د یادې اتحادیې د پلاویو له دوو سفرونو وروسته ورکول کېږي.
سرچینې دغه راز زیاته کړې، د اروپايي اتحادیې شاوخوا شلو هېوادونو وار دمخه د کېدونکو پروازونو په اړه ارزونې پیل کړې دي او په دې اړه معلومات راغونډوي چې د ډېپورټ پرمهال د کابل هوايي ډګر ظرفیت په ډاګه کړي.
تر اوسه لا روښانه نه ده چې د افغان لوري په ډله کې به څوک او د کومو ادارو استازي ګډون ولري او نه هم د کډوالو او بېرته راستنېدونکو چارو وزارت په دې اړه څه ویلي.
اروپا کې د کډوالو د حقونو فعال علیرضا کریمي وايي: « دا لړۍ ښايي له ګڼو حقوقي او بشري ننګونو سره مخ شي. داسې یوه هېواد ته د کډوالو استول چې لاهم له نا امنۍ او ګڼو بحرانونو سره لاس په ګرېوان دی، ممکن له نړیوالو قوانینو سرغړونه او په ځانګړې توګه د اجباري بېرته نه ګرځولو له اصل څخه سرغړونه وګڼل شي.»
دا مهال اروپايي هېوادونو کې د پخوا په پرتله د افغان کډوالو ایستلو موضوع ډېره توده شوې او همدې موضوع په ټاکنو کې د اروپا ښي اړخو ګوندونو په بریاوو کې رول لوبولی.
له دې سره، د ملګرو ملتونو د کډوالو چارو ادارې په دې تړاو اندېښنه ښودلې او ترڅنګ یې د کډوالو حقونو چارو فعالانو هم د اروپايي ټولنې دا ګام په دې برخه کې د شته قوانینو نقض بولي.
د کډوالو د حقونو فعال عبدالرازق عدیل وايي: « دا مهال د اروپايي سیاست په تله کې د ټولنیز امنیت او ټاکنو ګټلو وزن تر اخلاقي تعهداتو او د کډوالو له حقونو دروند دی. د اروپايي ټولنې له خوا د افغان کډوالو د شړلو سیاست داسې دی لکه د چړې په څوکه تګ. یوې خوا ته د دولتونو سیاسي او امنیتي اړتیاوې دي او بلې خواته د انساني کرامت اصول.»
معلومات ښيي چې له ۲۰۱۳ تر ۲۰۲۴ زېږدیز کالو په اوږدو کې اروپايي هېوادونو ته د افغانانو د پناه غوښتنې شاوخوا یو میلیون غوښتنلیکونه استول شوي.
دا داسې مهال ده چې جرمني له ۲۰۲۴زېږدیز کال راهیسې څه باندې ۱۰۰ افغان کډوال د قطر په همکارۍ په چارټر الوتنو کې هېواد ته را ستانه کړي دي.
