باوري سرچينو رسنیو ته ویلي، د اسلامي امارت درې ډیپلوماټان په ایران کې د افغانستان سفارت ته تللي او د ايران حکومت يې غوښتنه منلې ده.
د سرچینو د مالوماتو له مخې، په دې کسانو کې يو د سفارت درېيم سکرتر او دوه نور عادي کارکوونکي دي.
د ایران د بهرنيو چارو وزارت وياند سعيد خطيب زاده په دې تړاو ویلي، د نړيوالو کنوانسيونونو له مخې د دواړو هېوادنو د ډيپلوماتانو تبادله عادي خبره ده او د افغانستان د نوي حکومت له رسميت پېژندنې او نور مسايلو سره هېڅ تړاو نه لري.
په تهران کې د افغانستان سفارت،چې د تېر حکومت له سقوط راهیسې فعال دی، چارې يې د پخواني سرپرست سفير له لورې پر مخ وړل کېږي.
پر افغانستان د اسلامي امارت د واکمنۍ له پیل راهيسې شااوخوا ۸ مياشتې تېرې شوې، خو تر اوسه پورې هېڅ هېواد نوی حکومت په رسميت نه دی پېژندلی، خو له دې وړاندې د پاکستان، روسيې، چین، ترکیې، ترکمنستان او اوس ایران د اسلامي امارت ډيپلوماتيک استازي منلي دي.
