د هرات په انجيل ولسوالۍ کې پر عامو افغانان د ناپېژانده وسلهوالو له بريد څو ورځې تېرېږي، خو لا يې هم پر وړاندې غبرګونونه دوام لري.
اروپايي ټولنې دغه بريد وحشيانه بللی او زياته کړې يې ده چې پر ملکي وګړو بريد له هېڅ پلوه د توجيه وړ نه دی.
اروپايي ټولنې د يوه پیغام په خپرولو سره ویلي: « اورپایي ټولنه د ملکي وګړو پر وړاندې هر ډول او د هر چا له خوا تاوتریخوالی د توجیه وړ نه دی. موږ په هرات کې د وحشیانه برید د قربانیانو له کورنیو سره ژوره خواخوږي څرګندوو.»
هممهاله، د افغانستان لپاره د ملګرو ملتونو ځانګړي راپور ورکوونکي هم د برید له قربانیانو سره خواخوږي څرګنده کړې او د دې ترڅنګ يې د ياد بريد په اړه د ناپېيلو څېړنو غوښتنه کړې. د هغه په خبره، د برید عاملان باید پيدا او عدالت ته وسپارل شي.
ریچاډ بېنېت ویلي: « د هرات په انجیل ولسوالۍ کې بايد پر اهلتشیع وګړو وسلهوال وحشیانه برید نه یوازې وغندل شي بلکې په خپلواکه توګه دې وڅېړل شي او عاملین دې يې عدالت ته وسپارل شي.»
کورنيو چارو وزارت او يا هم نورې اړوندې ادارې د دې پېښې په اړه تازه څه نه وايي، خو وړاندې يې په دې پېښه کې د ۱۱ کسانو شهادت او څو نورو ټپي کېدل تایيد کړي.
دغه پېښه د انجيل په دهمهري کلي کې د جمعې په ورځ د ماسپښين شاوخوا درې بجې په داسې حال کې رامنځته شوې چې ناپېژانده وسلهوالو هلته د چکر لپاره پر ورغلیو کسانو ډزې وکړې.
کورنيو چارو وزارت د پېښې په اړه د يوه مشکوک کس نيولو خبر ورکړی.
