د بهرنیو چارو وزیر د چین په منځګړیتوب په ارومچي کې له پاکستاني لوري سره شوي مذاکرات مثبت ارزولي او هیله یې څرګنده کړې چې جزئي تخنیکي مسایل د مذاکراتو د پرمختګ بهیر له خنډ سره مخ نه کړي.
بهرنیو چارو وزارت په یوه خبرپاڼه کې ویلي، امیر خان متقي په کابل کې د ترکیې سفارت له شارژدافیر سادین ایلډز سره لیدلي.
د بهرنیو چارو وزارت مرستیال ویاند ضیا احمد تکل وايي، په دې لیدنه کې دواړو لورو د سیمې وروستیو پېښو او همدا راز د چین په ارومچي کې د افغانستان او پاکستان ترمنځ د شویو مذاکراتو په تړاو تفصیلي خبرې کړې دي.
ضیا احمد تکل وړاندې ویلي، بهرنیو چارو وزیر د کابل او اسلام اباد ترمنځ خبرو لپاره تر دې مخکې د ترکیې له خوا شوې هڅې هم ارزښناکه بللې دي.
بهرنیو چارو وزارت مرستیال ویاند ضیا احمد تکل وايي: « د هېواد بهرنیو چارو وزیر د دواړو هېوادونو ترمنځ اړیکې مثبتې وبللې او په دې برخه کې د ترکيې ورور هېواد د منځګړیتوب پخوانۍ هڅې ارزښتناکې وبللې. مولوي امير خان متقي پاکستاني لوري سره د وروستيو مذاکراتو په اړه وويل، تر دې دمه مثبتې خبرې شوې دي او هیله یې څرګنده کړه چې جزئي تخنيکي مسايل د مذاکراتو د پرمختګ بهیر له خنډ سره مخ نه کړي.»
د چین په کوربه توب د کابل او اسلام اباد د پلاو ترمنځ دا مذاکرات د روانې اپرېل میاشتې له لومړۍ نېټې تر اوومې نېټې پورې په ارومچي ښار کې ترسره شول.
د چین بهرنیو چارو وزارت ویلي، دا مذاکرات رغنده وو او دواړو لورو موافقه کړې چې تاوتریخوالی به کموي او شته ستونزې به د خبرو له لارې حلوي.
بهرنیو چارو وزارت مرستیال ویاند زیاتوي، په کابل کې د ترکیې سفارت سرپرست او شارژدافیر سادین ایلدز ویلي، هېواد ته یې د افغانستان او پاکستان ترمنځ اړیکې خورا مهمې دي.
بهرنیو چارو وزارت مرستیال ویاند په دې اړه وايي: « په دې ناسته کې د ترکيې جمهوريت سفير څرگنده کړه چې هېواد ته يې د افغانستان او پاکستان ترمنځ مثبتې اړيکې ځانگړی اهميت لري او په دې برخه کې به خپلو هڅو ته ادامه ورکړي.»
د چین په منځګړیتوب د ارومچي له خبرو مخکې ترکیه، قطر او سعودي عربستان هغه درې هېوادونه وو چې د کابل او اسلام اباد ترمنځ یې مذاکراتو لپاره هلې ځلې کولې.
د افغان لوري په خبره، هغه مهال د پاکستان د پلاوي له خوا د خبرو بیا بیا پرېښودل او نا مشروع غوښتنې د مذاکراتو د ناکامۍ لامل شوې.
د ترکیې، قطر او سعودي عربستان د منځګړیتوب هلوځلو ناکامېدو ته په کتو د چین له مذاکراتو هم زیاته تمه نه کېده.
که څه هم د شویو مذاکراتو په اړه زیات معلومات نه دي خپاره شوي او دا چې دواړو لورو په کومو مسایلو موافقه کړې، خو چین افغانستان او پاکستان درې واړه شوي مذاکرات رغنده بولي.
د چین بهرنیو چارو وزارت ویلي، دواړو خواو موافقه کړې چې تاوتریخوالی به کموي او شته ستونزې به په سوله ییز ډول حلوي.
له دې ټولو سره، څرګنده نه ده چې د کابل او اسلام اباد ترمنځ د خبرو بل پړاو به کله او په کوم ځای کې ترسره شي.
