هرات کې د افغاني سرې میاشتې ټولنې او ډنمارک سره صلیب کمېټې په همکارۍ، څه کم ۶۰۰ هغو کډوالو کورنیو ته د کوچنیو سوداګریزو فعالیتونو وسایل او روغتیايي کڅوړې وېشل شوې دي چې له پاکستان او ایران څخه راستانه شوې دي.
د چارواکو په خبره، له دې ډلې۶۰ کورنیو ته په ځانګړي ډول د هرې کورنۍ لپاره د ۳۰ زره افغانیو په ارزښت د کار وسایل برابر شوي، ترڅو وکولی شي له همدې لارې د خپلو کورنیو لپاره عاید پیدا ترلاسه او د ژوند لومړنۍ اړتیاوې پوره کړي.
د سرې میاشتې ټولنې د لوېدیځ زون مالي او اداري مدیر عبدالماجد خادمي وايي: « د هرات مرستون د لوېدیځ زون ریاست د هغو ۶۰ کورنیو لپاره چې له پاکستان او ایران څخه راستنې شوې دي، له ۲ میلیون څخه ډېرو افغانیو په ارزښت تجهیزات او توکي پېرلي، ترڅو هغوی وکولی شي په دغو وسایلو کوچني کاروبارونه پيل کړي او له دې لارې د خپلې کورنۍ اړتیاوې پوره کړي.»
په افغانستان کې د ډنمارک سره صلیب استازی فیروز تڼی وايي: « د ډنمارک سره صلیب سږ کال د افغاني سرې میاشتې ټولنې په همکارۍ په بېلابېلو ولایتونو کې د هغو ۱ زر ۳۰۰ بېوزله کورنیو لپاره د کاروبار وسایلو پېرلو پروګرام په پام کې لري چې په دې وروستیو کې له ایران او پاکستان سره راستنې شوې وي.»
راستانه شوي کډوال بیا وایي، که څه هم بېلابېل کسبونه یې زده دي، خو په خالي لاس راستنېدو او اقتصادي ستونزو له امله یې د کار وسایل نه درلودل.
دوی زیاتوي چې اوس به د ورکړل شویو وسایلو په کارولو سره وکولی شي د خپلو کورنیو لپاره نفقه پیدا کړي او خپل ژوند بېرته عادي حالت ته را وګرځوي.
له پاکستان څخه راستون شوی محمد حسین وايي: « زما د موبایل ترمیمولو کسب زده و، خو د وسایلو پېرلو وس مې نه درلود. له سرې میاشتې مننه چې د دغو وسایلو غم یې راته خوړلی. غواړم یو دوکان ونیسم او په دې وسایلو کار پيل کړم.»
له پاکستان څخه راستون شوی ولي خان وايي: « زه له پاکستان څخه راغلی یم او ډېر وخت کېږي وزګار وم. اوس د سرې میاشتې ټولنه د موټرسایکل او زرنج بارلېږدونکو د ترمیم وسایل راکوي. زه له سرې میاشتې ټولنې ډېره مننه کوم.»
راستون شوی عبدالله وايي: « له سرې میاشتې ټولنې مننه کوم چې زموږ خلکو ته د روغتیا ساتنې وسایل ورکوي. موږ له دوی تمه لرو چې خلکو ته د کار موندلو په برخه کې هم همکاري وکړي.»
دا په داسي حال کې ده چې سرپناه، کار، عاید او لومړنیو اسانتیاوو نه شتوالی د دغو راستنو شویو کورنیو له جدي ستونزو څخه بلل کېږي.
ټینګار دا دی چې د مرستو سره سره دې راستنو شویو کډوالو ته د کار زمینه هم برابره شي.
