د پرله پسې شدیدو ورښتنو او سېلابونو راوتو له امله تېره يوه شپه او ورځ په بېلابېلو ولايتونو کې ۱۵ کسان شهیدان، ۱۸ نور ژوبل شوي او یو کس لا درکه دی.
د طبیعي پېښو پر وړاندې مبارزې لپاره د چمتوالي ملي ادارې مسولان وایي، پر ځاني زيان سربېره په بشپړه توګه د ۱۳۹ کورونو په ویجاړېدو سره خلکو ته مالي زيانونه هم اوښتي.
د طبیعي پېښو پر وړاندې مبارزې لپاره د چمتوالي ملي ادارې وياند محمد یوسف حماد وايي: « د وري میاشتې له شپږمې نېټې تر نن ورځې د هېواد په کچه د بارانونو، سېلابونو، واورو، زلزلو، د چتونو نړېدو او غر ښوېیدنو له امله ۱۴۸ تنه شهیدان شوي، ۲۱۶ تنه ټپیان شوي او اته تنه لادرکه دي. همدارنګه ۱ زر ۱۴۹ کورونه په بشپړه توګه او ۱۶ زره ۷۰۰ جریبه ځمکه ویجاړه شوې او ۱۳۶ ونې له منځه تللې دي. په ټولیز ډول، ۷ زره ۵۰۴ کورنۍ د دې پېښو له امله زیانمنې شوې دي.»
د دې ادارې د معلوماتو له مخې، تر دې دمه په ټول هېواد کې د ورښتونو او سېلابونو له امله ۱۴۸ کسان شهیدان، ۲۱۶ ټپیان او ۸ تنه نور بې درکه شوي او دغه راز ۱۱۴۹ کورونه په بشپړه توکه ویجاړ شوي دي.
له دې سره، ملګري ملتونه وايي په ۲۰۲۶ زېږدیز کال کې ۴.۲ میلیون تنه بېړنۍ سرپناه او غیرخوراکي توکو ته اړتیا لري، خو وروستیو سېلابونو دغه اړتیا نوره هم زیاته کړې ده.
په ورته مهال، ټولګټو وزارت وایي په ټول هېواد کې د ورښتونو او سېلابونو راوتو له امله د لارو بندېدو مخنيوي او پاکارۍ لپاره بشپړ چمتوالی نیول شوی.
د ټولګټو وزارت ویاند محمد اشرف حق شناس وايي: « د شدیدو بارانونو، سېلابونو راوتو، واورو ورېدو او غر ښوېیدنو له امله د ایبک مزارشریف او ایبک پلخمري مسیرونه، همدارنګه به بادغیس، پنجشېر، ننګرهار او بامیان ولایتونو کې یو شمېر لارې د ټرافیکو پرمخ تړلې شوې وې چې د ټولګټو وزارت د ولایتي ریاستونو په هڅو بېرته پرانستل شوي. په ورته وخت کې د کابل- جلال اباد لویه لاره چې د تېرې ورځې راهیسې د تنګي غارو په سیمه کې د ټرافیکو پرمخ تړل شوې وه، د استحکامي پل او بدیل مسیر د جوړولو کارونه بشپړ شوي او اوس مهال له کابل څخه د جلال اباد په لور بار وړونکو وسایطو ته د تګ اجازه ورکړل شوې ده.»
د ورښتونو او سېلابونو له امله ځينې زيانمن شوي کسان بيا له مرستندويانو غوښتنه کوي چې د سرپناه په برابرولو کې ورسره بېړنۍ مرسته وکړي.
د سېلابونو له امله زیانمن شوی کس وايي: « سهار شپږ بجې زموږ دا یوه خونه ونړېده، پنځه تنه په کې شهیدان او څلور نور ژوبل شول.»
یو تن ژوبل شوی کس وايي: « د ننګرهار ولایت په سره رود ولسوالۍ کې سخت زورور سېلاب راغی، خلکو لوړو ته وختل، خو څو کسان یې یوړل.»
د سختو ورښتونو او سېلابونو راوتو له امله په ختيځو، شمالي او مرکزي ولايتونو کې نه يوازې خلکو ته مالي او ځاني زيانونه اوښتي بلکې يو شمېر کورنۍ د سېلابونو له ويرې د خپلو مېنو پرېښودو ته هم اړې شوې دي.
