له اسلامي امارته د کرزي غوښتنه؛ د نجونو پر مخ د ښوونځیو دروازې پرانېزئ 

د افغانستان پخواني ولسمشرر حامد کرزي د شنبې پر ورځ د «۱۴۰۱ کال د غويي پر ۳ مه» کابل کې د مدني ټولنو له یو شمېر غړو  او فعالانو سره د لېدنې پر مهال  یو ځل بیا له اسلامي امارته وغوښتل،چې له شپږم ټولګي پورته د نجونو پر مخ د ښوونځيو دروازې خلاصې کړي.

په دغه لېدنه کې کرزي  د نجونو  ټولو ښوونځیو پر پرانېستل کېدو او دغه راز دندو ته د ښځو پر بېرته ور ګرځېدو ټینګار کړی او ویلي یې دي،چې ښځې هم باید د نارینه وو په څېر زده کړې وکړي، تر څو د هېواد په ابادۍ کې ونډه واخلي.

اسلامي امارت ژمنه کړې وه،چې د نوي ښوونیز کال له پیل سره سم به ټول ښوونځي د نجونو پر مخ پرانیزي،خو هغه وخت بېرته له خپلې ژمنې پر شاه شول، چې نجونې د ښوونځیو دروازو ته رسېدلې وې.

د اسلامي امارت دا عمل په ملي او نړیواله کچه له سختو غبرګونونو او غندنو سره مخ شو.