په هرات کې یو شمېر ښځو پر افغانستان د پاکستان پوځي رژیم بریدونه او پر ایران د امریکا او اسراییلو له خوا روان بریدونه په سختو ټکو وغندل.
دغو ښځو د یوې غونډې په ترڅ کې ټینګار وکړ چې د ملکي وګړو او په تېره بیا د ښځو او ماشومانو په نښه کول باید بند شي.
دوی په خپلو خبرو کې د بشري حقونو نړیوالو قوانینو ته په اشارې وویل، د بې دفاع ښځو او ماشومانو په نښه کول د دغو قوانینو ښکاره نقض دی، ښځې او ماشومان باید د جګړو او سیاسي موضوعاتو ښکار نه شي.
د هرات اوسېدونکې سوسن کاظمي وايي: « زموږ بحث باید پر افغان ماشومانو او یا هم د اسلامي نړۍ پر ماشومانو متمرکز وي. نه باید د بهرنیانو له خوا پر ښځو او ماشومانو بریدونه وشي.»
د هرات اوسېدونکې سارا ادیب وايي: « موږ د افغانستان ښځې له اوږدې مودې راهیسې د جګړو له امله دردېږو او په ښه توګه کولی شو نن د نړۍ په بل هر هېواد کې د جګړو له امله د ښځو درد حس کړو.»
په همدې حال کې د لوېدیځ زون د ښځو صنايعو او سوداګرۍ خونې مسوولین هم وایي چې په هر ډول جګړه ییزو حالاتو کې باید ښځې او ماشومان خوندي وساتل شي.
د دوی په خبره، د ایران، امریکا او اسراییلو ترمنځ د کړکېچ له زیاتېدو سره، ښځینه سوداګرې هم زیانمنې شوې دي او روان حالت د افغان او ایراني مېرمنو ترمنځ په سوداګریزه راکړه ورکړه هم منفي اغېز کړی.
د لوېدیځ زون د ښځو صنايعو او سوداګرۍ خونې رییسه بهناز سلجوقي وايي: « څرنګه چې زموږ تجارت پېشه ښځو د ایران اسلامي جمهوریت له ښځو سره ډېرې اړیکې لرلې، له هغوی سره مو ګډ نندارتونونه او تفاهم لیکونه درلودل، خو له بده مرغه د جګړې له پيل کېدو سره دغه اړیکې پرې شوې دي او د افغانستان سوداګرې ښځې ایران ته صادرات او واردات نه لري.»
بله خوا، هرات کې د ایران کونسلګرۍ فرهنګي مسوولینو هم هر ډول شرایطو کې له افغانانو څخه د ملاتړ ډاډ ورکړ او ټینګار یې وکړ چې د دواړو ملتونو اړېکې د ګډو ارزښتونو په لرلو سره د متقابلې همکارۍ او ملاتړ پر بنسټ ولاړې دي.
هرات کې د ایران کونسلګرۍ فرهنګي مسوول مهدي حسني وايي: « د افغانستان او ایران د ملتونو ترمنځ دغه همدلي او غمشریکي په وروستیو پېښو پورې اړه نه لري بلکې سلګونه کاله او پېړۍ کېږي چې دا خلک یو د بل ترڅنګ اوسېږي. کله چې دلته کومه پېښه شوې، د ایران خلک لومړني هغه دي چې مرستې ته راغلي او که ایران کې څه پېښه شوې، د افغانستان خلک تر نورو مخکې مرسته ته ورغلي. دا هم د افغانستان او هم ایران لپاره د ویاړ خبره ده.»
د افغانستان او ایران له ښځو څخه د ملاتړ دا غونډه داسې مهال جوړه شوې چې له دې یوه ورځ مخکې د ایران بهرنیو چارو وزارت اعلان وکړ چې پر دې هېواد د امریکا او اسراییلو روانو بریدونو کې یو شمېر افغان وګړو ته هم مرګ ژوبله اوښتې.
