Skip to content
د بلخ مرکز په مزار شریف کې د اهل تشیع پر جومات د وړمې ورځې خونړي برید،چې لسګونه لمونځ کوونکو ته په کې مرګ ژوبله واوښته،پر کور دننه او بهر غبرګونونه پارولي.
د افغانستان پخواني ولسمشر حامد کرزي د بلخ برید ته په غبرګون کې دا برید بشري جنایت او د اسلامي او انساني ارزښتونو خلاف عمل بللی دی.
کرزي زیاته کړې:« په ډېرې خواشینۍ سره باید ووایم، چې د بلخ په سی دکان جومات کې برید زموږ لسګونه هېوادوال شهیدان او ټپيان کړل،چې بشري ضد جنایت دی. د هېواد د ژغورلو لپاره د بهرنیو کړیو د دسیسو پر وړاندې په ملي یووالي ټینګار کوم.»
د افغانستان لپاره د ملګرو ملتونو د بشرحقونو شورا ځانګړي راپورټر او د افغانستان لپاره د اروپايي ټولنې ځانګړي استازي ټوماس نکلاسن هم د بلخ برید غندلی او دلته یې له بشري حقونو د سرغړونې په دریدو ټينکار کړی.
د ملګرو ملتونو د بشر حقونو ځانګړی راپورټر ریچارډ بېنیټ وايي:« په افغانستان کې دې په جوماتونو او ښوونځیو سیسټیماټیک بریدونه وڅېړل شي او په افغانستان کې له بشري حقونو سرغړونې دې پای ته ورسېږي.»
د افغانستان لپاره د اروپايي ټولنې ځانګړی استازی توماس نیکلاسن وايي:« زه د ریچارډ بېنیټ غږ بدرګه کوم،په افغانستان کې دې له بشري حقونو سرغړونې پای ته ورسېږي او د دې ډول بریدونو باید څېړنه وشي.»
به کابل کې د ایران سفارت هم د بلخ برید غندلی او د برید له قربانیانو سره یې خپله خواخوږي څرګنده کړې.
کابل کې د ایران سفارت وايي:« یو ځل بیا ناپاکو،جنایتکارانو او تروریستانو د روژې په مبارکه میاشت کې د افغانستان مسلمان وګړي په نښه کړل، ایران د دغه برید د غندلو ترڅنګ قربانیانو ته لوړه درجه او کورنیو ته یې صبر او د زغم هېله لري.»
د مخکېني حکومت د بهرنیو چارو وزیر حنیف اتمر هم د بلخ په سی دوکان جومات چې قربانیان یې ټول ملکي وګړي او لمونځ کوونکي دي، غندلی دی.
اتمر زیاته کړې:«دا برید په شیعه مذهبو نه بلکې د افغانستان پر ټولو وګړو دی. د ملګرو ملتونو،د بشري حقونو نړیوال سازمان او د جرمونو له نړیوالې محکمې غواړم،چې د دې بریدونو پر وړاندې خپل غږ پورته کړي او د څېړنو غوښتنه دې وکړي.»
د پاکستان پارلمان غړی او د ملي جمهوري غورځنګ غړي محسن داوړ هم دغه برید خواشینی کړی دی.
داوړ وايي:« د افغانستان په بېلابېلو ښارونو کې د بریدونو روانه لړۍ، په خاصه توګه د شیعه هزاره ګانو د ډله ییزې وژنې او د افغانانو د ټولو کړاوونو په تړاو باید نړۍ پام وکړي او دا هر څه سم وڅاري.»
د افغانستان اسلامي امارت ویاند ذبیح الله مجاهد په افغانستان کې د تېرې ورځې بریدونه غندلي او دا یې د بهرنیو کړیو کار بللی دی.
مجاهد زیاته کړه:«د افغانستان اسلامي امارت په کابل، بلخ او کندز کې پر ملکي خلکو چاودنې په کلکو ټکو غندي. دغه جنایات د هغو کړیو کار دی،چې په افغاني ټولنې پورې هيڅ تړاو نه لري. موږ د شهیدانو او ټپيانو له کورنیو سره ژوره خواخوږي ښيیو،شهیدانو ته جنت او ټپیانوته عاجله شفاء غواړو.»
د وړمې ورځې برید ته د مخکیني حکومت د ملي روغې جوړې عالي شورا مشر او نورو سیاسیونو هم غبرګونونه ښودلي او دا یې یو بشري جنایت یاد کړی.
دوی په افغانستان کې د وژنو او مرګونو بریدونو د ژر تر ژره د درېدو غوښتنه کوي او په حاکم نظام غږ کوي،چې د داسوې بریدونو مخه ونیسي.
