د ملګرو ملتونو د ماشومانو وجهي صندوق یا يونيسف تائید کړې،چې په خوست او کونړ ولايتونو کې پاکستان له لوري د تېرې شنبې په هوايي بريدونو کې د وژل شویو کسانو له ډلې یې ۲۰ ماشومان وو، چې ۱۵ نجونې او پنځه هلکان په کې شامل دي.
د افغانستان لپاره د يونيسف مشر محمد ايويا پر خپله ټویټر پاڼه لیکلي،دغه ماشومان په خپلو کورونو کې په داسې حال کې وژل شوي،چې په خوب ويده ول.
يونسيف وايي،د ماشومانو پر وړاندې تاوتریخوالی په هر ډول باید پای ته ورسېږي او له ټولو خواوو یې غوښتنه کړې،چې د نړیوالو قوانینو له مخې ولسي وګړو او ملکي زیربناوو ته له زیان رسولو ډډه وکړي.
د تېرې شنبې په ورځ د پاکستان پوځ جېټ الوتکو د خوست او کونړ ولايتونو پر يو شمېر سيمو بمبارۍ وکړې،چې درنه مرګ ژوبله يې واړوله.
د پاکستان دغو هوايي برېدونو پر کور دننه او بهر پراخ غبرګونونه راپارولي او د پاکستان پر ضد په بېلابېلو ولایتونو کې لاریونونه هم شوي دي.
