د سیاسي یو شمېر کارپوهان وايي، د افغانستان د نظام په موجودیت کې د افغانستان په تړاو له پاکستان سره د امریکا متحد ایالتو خبرې په ښکاره د افغانستان پرملي حاکمیت باندې تیری دی او پر و ینا یې د ګاونډیانو پرځای دې د افغانستان په تړاو هره اندیښنه باید له اسلامي امارت سره شریکه شي.
د سیاسي چارو کارپوه حکمت الله حکمت وايي:« پاکستان او امریکا د افغانستان د اشغال او غمیزې دوه شریکان وو او د امریکا خبرې له پاکستان سره د افغانستان په اړه دا د افغانستان په ملي حاکمیت باندې تیری دی. افغان لوری باید په جدي توګه باندې امریکا او پاکستان ته دا واضح کړي،چې هر نوع خبرې د افغانستان د سولې او راتلونکي په اړیکو په اړوند باندې باید له اسلامي امارت سره ترسره شي،نه له کوم ګاونډي هېواد سره.»
د امریکا متحده ایالتو بهرنیو چارو وزارت وايي، له پاکستان سره له نږدې کار کوي،چې په افغانستان کې دایمي ثبات راولي او پر نوي حکومت د افغانانو د لومړنیو او اساسي حقوقو د منلو په موخه هڅې وکړي.
پخوانی پوځي سرور نیازی وايي، پاکستان په سیمه کې د افغانستان ستراتیژیک ملګری دی او له لسیزو راهیسې دغه هېواد په افغانستان او سیمه کې د امریکا متحده ایالتو ستراتیژۍ او پلانونه پلي کوي او اوس امریکا خپل هغه ماموریت،چې پخوا یې افغانستان کې درلود،پاکستان ته ورسپارلی دی او اسلام اباد د کابل په ټولو چارو کې لاسوهنه پیل کړې ده.
پخوانی پوځي سرور نیازی وايي:« پاکستان هغه هېواد دی،چې له پنځو کلونو راپدیخوا د امریکا پلانونه په افغانستان او سیمه کې پلې کوي او د امریکا یو ستراتیژیک ملګر دی. اوس داسې ښکاري،چې امریکا خپل ټول هغه ماموریتونه چې پخوا یې افغانستان کې درلودل،هغه یې پاکستان ته سپارلي دي او پاکستان په ډېره بې شرمۍ د افغانستان په ټولو چارو کې لاسوهنه کوي.»
پخواني دیپلوماتان بیا په دې باور دي،هغه چې طالبان سیاسي اړخ نه ول، امریکا ورسره خبرې کولې، ناستې یې درلودې او حقوقي سند یې ورسره لاسلیک کړ، او اوس چې په افغانستان حاکمیت لر، نظام یې جوړ کړی او دیپلوماتیک چینلونه لري،امریکا د افغانستان قضایاوو په اړه بحثونه له طالبانو سره نه بلکې له پاکستان سره شریکوي،چې د دې مانا دا ده واشنګټن غواړي، د کابل ټول کنټرول د اسلام اباد په واک کې ورکړي.
دوي وايي،اسلامي امارت او افغان ولس ته په کار دي،چې د امریکا او پاکستان د دغې طوطیې پروړاندې هوښیار واوسي او خپل یووالی وساتي.
پخوانی ډیپلومات عزیز معارج وايي:«دا چې له پرونه طالبان یوه ډله وه او امریکا ورسره په دوحه کې حقوقي سند لاسلیک کړ. ا وس چې طالبان یو دولت دی امریکا ورسره خبرې نه کوی او وايي د افغانستان ثبات لپاره له پاکستان سره خبرې کوي. دا په دې مانا ده،چې امریکا دا ثابتول غواړي،چې د اسلامي امارت دولت د پاکستان له اثر لاندې دی او له بل لوري غواړي،چې د افغانستان کنټرول د پاکستان لاس کې ورکړي، نو طالبان باید په دې اړه ډېر احساس او هوښیار واوسي او د افغانستان ملت باید یو لاس واوسي،چې د امریکا دغه طوطیه شنډه کړي.»
د افغانستان د بهرني چارو وزارت د ویاند مرستیال ضیاء احمد تکل بیا وايي، اوس په افغانستان کې مسوول او خپلواک حکومت رامنځ ته شوی او د نړۍ ټول هېوادونه باید د افغانستان په تړاو هره خبره د افغانانو له مرکزي حکومت سره شریکه کړي، نه له هغو ادرسونو سره چې نه په افغانستان کې حضور لري او نه په قضایاوو کې ښکیل دي.
تکل زیاته کړه:« افغانستان اوس یو مسوول او ټول واک حکومت لري، نو د نړۍ او ټولو هېوادونو لپاره اړینه ده،چې د افغانستان له مرکزي حکومت سره د افغانستان د قضایاو او مسایلو په اړه خبرې او بحثونه وکړي، نه دا چې له هغو ادرسونو سره چې افغانستان کې حضور نه لري او نه هم د افغانستان په قضایاوو کې دخیل دي، نه هم هغه خبرې چې دوی یې له نړۍ د افغانستان په اړه کوي،عملي جامه وراغوستلی شي.»
د امریکا متحده ایالت دا خبره داسې مهال راپورته کوي،چې پر افغانستان د پاکستان د پوځ جنګي الوتکو له هوايي بریدونو وروسته لسګونه ښځې او ماشومان په کې شهیدان شول، د کابل او واشنګټن ترمنځ اړیکې ترینګلې شوي دي.
