مجاهد: اسلامي امارت د رسمیت پېژندنې لپاره ټول شرایط پوره کړي 

د افغانستان اسلامي امارت ویاند ذبیح الله مجاهد د دوشنبې پر ورځ د « ۱۴۰۱ کال د وري پر ۲۹ مه» د متحده عرب اماراتو د بشري مرستو د تسلمېدو پر مهال وویل،د رسمیت پېژندې لپاره یې ټول شرایط پوره کړي او په دې برخه کې نوره هېڅ پلمه پاتې نه ده.

مجاهد وايي، نړیوالو ته هېڅ داسې پلمه پاتې نه ده،چې نور د افغانستان د نوي حکومت پر رسمیت پېژندل وځنډوي.

دغه راز هغه وايي، که نړیوال هرڅومره ژر د افغانستان نوی حکومت پر رسمیت وپېژني، افغانستان به په سیاسي برخه کې ښه پرمختګ وکړي.

پر افغانستان د اسلامي امارت له واکمن کېدو شااوخوا اته میاشتې تېرېږي،خو لا هم هېڅ هېواد د اسلامي امارت حکومت پر رسمیت نه دی پېژندلی.