د پاکستان پوځي رژیم یوځل بیا تېر مازدیګر د کونړ ولایت د مرکز اسعد اباد په ځینو سیمو بریدونه کړي او له امله یې ملکي وګړو ته مرګ ژوبله او استوګنیزو کورونو ته زیانونه رسېدل.
د حکومت مرستیال ویاند حمدالله فطرت وايي، د لومړینو معلوماتو له مخې په دې بریدونو کې ۱۶تنه چې ډېری یې ښځې او ماشومان دي، ټپیان شوي او یو تن هم شهید شوی دی.
پر ملکي وګړو او کورونو دا بریدونه داسې مهال کېږي چې له دې وړاندې هم د پاکستان پوځي رژیم ملېشو په نورستان ولایت کې پر ملکي وګړو او له لارو تېرېدونکو مسافرو باندې د توپونو بریدونه کړي دي.
پر افغانستان د پاکستان پوځي رژیم په بریدونو کې ډېری مرګ ژوبله ملکي وګړو او ملکي تاسیساتو ته اوښتې.
د روژې میاشتې په ۲۷ مه، د پوځي رژیم په یوه هوايي برید کې د کابل امېد روغتون هدف وګرځول شو. په دې برید کې شاوخوا ۴۰۰ ناروغان شهیدان او له ۳۰۰ زیات ژوبل شول.
