د ایراني رسنیو د راپورونو له مخې، د تهران سوېل کې د ری ښار پر ۱۳ مه منطقه د امريکا په توغنديز بريد کې د يوې افغانې کورنۍ شپږ غړي شهيدان شوي دي.
د راپورنو له مخې، په دې بريد کې د يادو افغانانو ترڅنګ څلورو ايراني وګړو هم ژوند له لاسه ورکړی.
د فارس خبري اژانس د راپور له مخې، له دې وړاندې هم پر ايران د اسرایيلو او امريکا په بريد کې د سکندر رحيمي په نوم يو افغان په خوزستان او د کوثر عادلي په نوم بل افغان د ورامین په خیرآباد سیمه کې شهيدان شوی و چې جسدونه يې په ایران کې خاورو ته سپارل شوي.
ایران کې د امریکا او اسراییلو د بریدونو شدت او په کې د اوښتې ملکي مرګ ژوبلې شمېرو ته په کتو، ښايي نورو افغان وګړو ته هم مرګ ژوبله اوښتې وي، خو په دې اړه هېڅ ډول کره معلومات نه دي خپاره شوي.
تهران کې د افغانستان سفارت هم د تازه شپږو شهيدو شویو افغانانو په اړه څه نه دي ويلي.
