د سیاسي چارو شنونکی سرور نیازی وايي:« پاکستان په ډېره بې شرمانه توګه راکټي بریدونه په هوايي بریدونو بدل کړل. فکر کوم پاکستان غواړي،په دې توګه نړیوالو ته وښي،چې له طالبانو سره روابط نه لرو او اوس افغانستان ترهګرو په ځاله بدل شوی دی. که چیرې یې مخه ونه نیول شي،پاکستان به نورو اعمالو ته هم لاس پورې کړي.»
له پاکستان سره د دې موضوع د حل لپاره پر سیاسي حل لارې هم ټینګار کیږي .
پخواني دیپلوماتان وايي، د نړیوالو دیپلوماتیکو اصولو پر اساس لومړی باید په کابل کې د دغه هېواد سفیر احضار شي او بیا د بهرنیو چارو وزارت له لارې په اعتراضي ډول د شویو بریدونو په تړاو دې له پاکستانه وضاحت وغوښتل شي او له هغې وروسته دې یې پر وړاندې پوځي اقدام وشي.
پخوانی ډیپلومات عزیز معارج وايي:« د یوه هېواد په حریم باندې او په ځانګړې توګه په ځکمنۍ بشپړتیا یې حمله کول ساده خبره نه ده،پخوا چې هرڅه ول، خو اوس چې طالبان حاکمیت لري او پآکستان راځي،په مستقیمه توګه د افغانستان خاوره بمبار کوي، دا د ډیپلوماتیکو اصولو پر بنیاد باندې په لومړي سر کې د هغه هېواد سفیر احضار کیږي او وضاحت غوښتنه ترې کیږي او بیا د بهرنیو چارو وزارت له خوا نه په احتجاجي ډول له مقابل هېواده د وضحاحت غوښتنه کیږي او که په دې هم ونه شوو،بیا حق لري،چې باالمثله عمل وکړي، ځکه دفاع د هر هېواد حق دی.»
دلته ډیورنډ فرضي کرښې ته څېرمه نیمروز ولایت کې هم پاکستاني پوځیانو په چاغې او نوکنډي سیمو کې د افغانانو پر موټرونو ډزې کړي او لار یې پرمخ تړلې ده.
د لارې له تړل کیدو وروسته موټر چلوونکو اعتراض کړی او پاکستاني ځواکونو پرې ډزې کړي،چې له امله یې څو تنه موټر چلوونکي وژل شوي دي .
اسلامي امارت بیا تراوسه په دې تړاو په رسمي توګه څه نه دي ویلي.
وموغوښتل،چې د دغې موضوع په تړاو د ملي دفاع وزارت نظر هم ولرو،خو د دغه وزارت مطبوعاتو مشر او ویاند زموږ پیغام او پوښتنې ځواب نه کړې.
