د ملګرو ملتونو کارپوهانو پر افغانستان د پاکستان پوځي رژیم له خوا کېدونکي بریدونه د ملګرو ملتونو له چارټر دویمې مادې او نړیوالو قوانینو سره په ټکر کې بللي.
د دوی په خبره، د ملګرو ملتونو د چارټر دویمه ماده کې د ځواک کارول منع شوي دي.
د ملګرو ملتونو دغو کارپوهانو ویلي، د پاکستان پوځي رژیم تر هغو د ځان د دفاع لپاره د اقدام کولو حق نه درلود چې لومړی پرې د افغانستان له لوري برید نه وای شوی او یا یې هم د ټيټيپي وسله وال پر پاکستاني ځواکونو د برید لپاره نه وای ور استولي.
د جرمونو نړیوالې محکمې هم هغه استدلال رد کړی چې وايي په یو هېواد کې د ترهګرو ډلو موجودیت له امله بل هېواد کولی شي پر هغه هېواد برید وکړي.
د جرمونو نړیوالې محکمې ویلي: « د زور غیرقانوني کارول په دې مانا دي چې پاکستان په دې بریدونو کې د وژل شویو ټولو کسانو د ژوند کولو بشري حق تر پښو لاندې کړی. ځینې بریدونه چې د ملکي تلفاتو لامل کېږي، ممکن له نړیوال بشري قانون څخه سرغړونه هم وګڼل شي.»
د ملګرو ملتونو یادو کارپوهانو دا هم ویلي چې د پاکستان له خوا تر اوسه داسې کره شواهد نه دي وړاندی شوي چې وښيي په خاوره کې یې بریدونه د افغان حکومت په لارښوونه ترسره کېږي.
د ملګرو ملتونو کارپوهان په دې ټینګار کوي چې هر هېواد د ترهګرو له ګواښ څخه د خپلو خلکو د خوندیتوب حق لري، خو دا څه باید د نړیوالو قوانینو سره سم ترسره شي.
د ملګرو ملتونو د کارپوهانو له خوا دا بحث داسې مهال شوی چې د پاکستان پوځي رژیم ملېشې په خپلو بریدونو کې په بیا بیا د ښځو او ماشومانو په ګډون ملکي وګړي او عامه تاسیسات په نښه کوي.
په کابل کې د روږدو د درملنی پر روغتون د پاکستان پوځي رژیم برید یې یوه څرګنده بېلګه ده.
په دې برید کې د ورکړل شویو معلوماتو له مخې، له ۴۰۰ زیات کسان شهیدان او شواخوا ۳۰۰ نور ټپیان شوي دي.
د ملګرو ملتونو کارپوهانو د روږدو پر روغتون دا برید په کلکو ټکو غندلی او هغه يې له نړیوالو قوانینو سرغړونه بللې ده.
د ملګرو ملتونو کارپوهانو وړاندې له دواړو هېوادونو غوښتي چې اوربند نوی کړي او په خپلو کې د سولې موافقه وکړي.
د دوی په خبره، هغه کړکېچونه چې نړیوال امنیت له ګواښ سره مخ کوي، باید په سوله ییز ډول حل شي.
دوی دا هم ویلي چې له افغان حکومت او پاکستان دواړو سره د دې مسایلو په تړاو په تماس کې دي.
تر دې مخکې د بښنې نړیوال سازمان د پاکستان له پوځي رژیم د شوي برید په تړاو د وضاحت غوښتنه کړې او وايي، دوی باید وضاحت ورکړی چې دا برید یې د کومو معلوماتو پر بنسټ کړی او ایا د دغو معلوماتو د تایید لپاره یې کوم ګام پورته کړی که نه؟
