Skip to content
په سوېل کې د پکتیکا ولایت د مټاخان ولسوالۍ ابراهیم کاریز سیمه کې د احساس خیریه بنسټ له لوري هغو بې وزله کورنیو سره د خوراکي توکو مرسته شوه،چې شمشاد نیوز یې د اوسېدونکو پر ژوند ځانګړی رپورټ خپور کړی و .
د احساس خیریه بنسټ مشر عبدالفتاح جواد وايي:« تیرو کلونو کې په دغه کلي کې ډېره بده پېښه شوې وه. بیا شمشاد تلویزیون د دغو خلکو پر ژوند رپورټ خپور کړ،د هغه رپورټ پر بنیاد موږ دلته د احساس خیریه بنسټ له لوري خوراکي توکي راوړل.»
کلونه وړاندې د ابراهیم کاریز سیمه کې بهرنیو ځواکونو شپني عملیات ترسره کړي او د یو شمیر کورنیو ۴۹ غړي په کې وژل شوي وو .
احساس خیریه بنسټ دلته پر ۱۵۰ بې وزله کورنیو خوراکي توکي وویشل،چې اوړه وریجې، غوړي،بوره او چای په کې شامل دي.
د یاد بنسټ مشر عبدالفتاح جواد وايي:« دلته موږ ۱۵۰ بې وزله کورنیو ته خوراکي توکي راوړي، د ابراهیم کاریز او شااوخوا سیمو کې یې د قربانیانو پر کورنیو او نورو بې وزله خلکو ویشو.»
د ابراهیم کاریز اوسیدونکي د هغه وخت د بهرنیو ځواکونو د عملیاتو او د اوسني ژوند د بې وسۍ کیسې لري .
د ابراهیم کاریز یو تن اوسېدونکی داسې وايي:« څلور پنځه یتیمان را پاتې دي. یوه معیوبه ده. نه پوهیږم په څه شي لګیدلې،خو پښه یې اووه ځایه زحمي ده،په پښه همداسې ښووییږي. یوه لویشت ځمکه دلته نه لرم، ژاولې او پاپړ خرڅوم او مور مې تر لاس نیولې ګرځوم په سترګو ړنده ده.»
د شمشاد نیوز د ځانګړي رپورټ له خپریدو وروسته د شهیدانو او معلولینو چارو وزارت هم ابراهیم کاریز سیمې ته یو پلاوی استولی او یو شمیر خیریه بنسټونو په ورته ډول پر خلکو خوراکي توکي ویشلي دي.
