هرات کې پر موټرسایکلونو د مسافرو لېږد زیات شوی چې ورسره جوخت د ټرافیکي پېښو په اړه د خلکو اندېښنې هم زیاتې شوې دي.
د خلکو په خبره، د اختر په شپو ورځو کې د ښاري ټرانسپورټ د کمښت له امله ډېری خلک د تګ راتګ لپاره له موټرسایکلونو کار اخلي، خو ټرافیکي اصولو په پام کې نه نیولو او بې احتیاطۍ له امله د پېښو زیاتېدو لامل کېږي.
د هرات اوسېدونکی غلام رسول وايي: « خلک مجبور دي، ستونزې لري. کار نه شته، قېمتي ده او کرایې هم لوړې دي. له همدې امله خلک په موټر سایکلونو ځي راځي.»
د هرات اوسېدونکی ګل احمد وايي: « ډېری موټرسایکلونه نمبرپلېټ نه لري، ټرافیکي اصول نه پېژني. حتا دا ستونزه هم شته چې موټرسایکل والا غل او تاسو برمته کړي.»
بله خوا، موټرسایکل چلوونکي وایي د بې روزګارۍ او کورنۍ ته د ډوډۍ پیدا کولو لپاره اړ دي چې ښار کې پر موټرسایکل مسافر هم ولېږدوي.
دوی وايي، که ورته د بل کار زمینه برابره شي له دې کاره به لاس واخلي.
موټرسایکل چلوونکی احمد شفیع وايي: « ما لس کاله ایران کې هم پر موټرسایکل مسافر لېږدول. اوس دلته هرات کې هر کار کوم، مسافر لېږدول، خټګري او کارګري کوم، ځکه بې کاري ده او کاروبار نه شته.»
موټرسایکل چلوونکی عبدالکریم وايي: « دا موټرسایکل مې له مجبورۍ را ایستلی مسافر پرې لېږدوم، دا هم څه نه راګټي خو بیا هم ۱۰۰ تر ۲۰۰ افغانیو پيدا کوم.»
موټر سایکل چلوونکی عبدالستار وايي: « له بېکارۍ او ستونزو مې په دې موټرسایکل کار پيل کړی. زه خپله ګچ کار یم، خو کار نه شته ځکه مې په موټر سایکل د مسافرو لېږدول پيل کړي.»
بله خوا، د هرات ځایي مسوولین وایي ښار کې له ټکسي او ښاري ملي بسونو پرته په نورو شخصي وسایلو د مسافرو لېږد منع دی او له سر غړونکو سره د جدي چلن خبره کوي.
د هرات ټرافیکو مدیر شېر محمد حجازي وايي: « په ښار کې باید یوازې ټکسي او ملي بس مسافر ولېږدوي، موږ حتا شخصي موټرو ته هم د مسافر لېږدولو اجازه نه ورکوو. موږ له هغو شخصي موټر لرونکو او موټر سایکل لرنکو سره قانوني چلن کوو چې ښار کې مسافر لېږدوی. موږ د دی وسایط ترې ګرځوو، بیا د شکایت حق نه لري.»
هرات ښار کې په داسي حال کې پر موترسایکلونو د مسافرو لېږد زیات شوی چې څه موده وړاندې د دې ښار مرکزي او یو شمېر نورو سړکونو باندي د رېکشاوو په تګ راتګ بندیز لګېدلی.
