د افغانستان اسلامي امارت بهرنیو چارو وزارت وايي،افغان پلاوی له اوزبک چارواکو سره د ریل پټلۍ او ګمرکي چارو پرسر د خبرو لپاره ترمز ته تللی دی.
د یاد وزارت د اقتصاد مشر شفیع اعظم وايي، ترمز ښار کې به دواړه لوري له ترمز تر حیرتان بندر د اوسپنې پټلۍ او په ګمرکاتو کي د اسانتیاوو رامنځته کولو خبرې وشي.
اعظم زیاته کړه:« د ازبکستان ترمز ښار ته د اوسپنې پټلۍ او د ګمرکاتو د برخې مسولین تللي دي،له خپلو سیالانو سره له ترمز بیا تر حیرتانو بندر پورې د اوسپنې پټلۍ د حسابونو د تصفیې او ګمرکي مسایلو خبري وشي،ځکه د افغانانو ډېر موټر دې غاړي او هغې ته ولاړ دي او موټرو ته اجازه نه ورکول کیږي»
اخوا د اقتصادي چارو یو شمېر شنونکي بیا وايي،د ازبکستان له ترمز بیا د افغانستان تر تورخم د اوسپنې پټلی به وکولای شي،د افغانستان تجارتي روابط له منځنۍ آسیا سره پیاوړي کړي.
د اقتصادي چارو شنونکی محمدنبي افغان وايي:« پاکستان او ازبکستان غواړي،د ریل پټلۍ له لارې وصل شي،خو وړاندې سیاسي او امنیتي ستونزې وې،سیمه دې ته اړتیا لري،چي منځنۍ اسیا سره وصل شي او د سیمي هېوادونه هڅې کوي،ځانونه ورګډ کړي.»
یو شمیر هغه کسان چي د ازبکستان او افغانستان ترمنځ تجارت لري مني،چي هلته په شپو له باره ډک موټر ولاړ وي او په میلیونونه افغانۍ زیان ویني.
سوداګر خپلواک افغان وايي:« دافغان سوداګرو دا ستونزه ده،له ازبکستان هېواد سره چي په ترمز کې له باره ډک موټر ولاړ وي او کیسونه اخلي او شل ورځې وروسته موټرو ته اجازه ورکول کیږي،چي خپل مال افغانستان ته راوړي.»
وړاندې داسي خبرونه خپاره شول،چي له ترمز څخه د افغانستان پر لور د ازبکستان له لوري د اوسپنې پټلۍ چاري پیل شوي،خو تر دې مهاله مالومه نه ده،چې دا پروژه به څومره وخت ونیسي.
