د افغانستان اسلامي امارت بهرنیو چارو سرپرست وزیر امیر خان متقي په ایران کې له افغان کډوالو سره د وروستي ناوړه چلن او د تاوتریخوالي مخنیوي په موخه د یکشبنې پر ورځ د «۱۴۰۱ کال د وري پر ۲۱ مه» په کابل کې د ایران له سفیر بهادر امینیان سره کتلي دي.
په دې کتنه کې متقي په ایران کې له افغان کډوالو سره د شوي چلن په اړه اندېښنه څرګنده کړه او د ایران سفیر ته یې په ټینګار سره وویل،چې خپلو مشرانو ته دا پیغام ورسوي،چې خپلو امنیتي او اړوندو ادارو ته له افغان کډوالو سره په سرحدي سیمو او ښارونو کې د ناسمو کړنو د مخنیوي په اړه لازمې لارښوونې وکړي.
امیر خان متقي ویلي،په ایران کې له افغان کډوالو سره ناسم چلن د دواړ هېوادونو پر اړیکو او عام ذهنیت منفي اغیز کوي او د دواړو هېوادونو دښمنانو ته د تخریب او اختلاف اچولو فرصت ورکوي.
هغه زیاته کړه،چې د افغان کډوالو له نومه په استفادې هیڅ مجرم د ټولو د فکر، نیت او عمل استازیتوب نه کوي.
په همدې حال کې د ایران سفیر د بهرنیو چارو سرپرست د وزیر اندېښنو ته په ځواب کې ویلي، د امام علی رضا په حرم کې د چاقو پر مټ د روحانینو او خادم له مرګ ژوبلې وروسته ځینو کړیو د یوه پلان له مخې،د دواړو هېوادونو د ولسونو تر منځ د کرکې او بدبینۍ د رامنځته کولو په موخه منفي تبلیغات پیل کړي دي.
بهادر امینیان په ایران کې افغان کډوال خپل مېلمانه بللي او ویلي یې دي،چې له ۴۳ کالو را وروسته په ایران کې د افغان کډوالو سلوک ثابته کړې،چې له ایراني ولس سره مینه او دوستانه تعامل لري.
امینیان ویلي،حکومت یې له افغان مهاجرینو سره د بد چلن نیت نه لري او هڅه کوي،د دواړو هېوادونو اړېکې سره نږدې او باوري شي او د اسلامي امارت پيغام به خپلو مشرانو او حکومت ته ورسوي.
