روسیه کې د افغانستان سفارت د  اسلامي امارت له لوري استول  شوي ډيپلومات ته وسپارل شو 

د افغانستان اسلامي امارت بهرنیو چارو وزارت له لوري د شبنې پر ورځ د «۱۴۰۱ کال د وري پر ۲۰ مه»  په خپره شوې خبرپاڼه کې ویل شوي،چې په مسکو کې د افغانستان سفارت د دوی له لوري استول شوي ډیپلومات ته سپارل شوی دی. 

خبرپاڼه  کې د روسيې له حکومته مننه شوې، چې د افغانستان ډيپلومات ته يې باورليک ورکړ او زمينه يې برابره کړې،چې په روسيه کې مېشتو افغانانو ته پر وخت خدماتو وړاندې کولو کې خپل رول ولوبوي.

خبرپاڼه کې وړاندې راغلي،چې د افغانستان اسلامي امارت د مشروع حکومت په توګه حق لري،چې له هېواده بهر د افغانستان د سياسي استازوليو مدیریت په لاس کې واخلي.

بهرنیو چارو وزارت وایي،اسلامي امارت هڅه کوي،چې له نړۍ سره مسوولانه تعامل وکړي.