د اختر په رانږدې کېدو سره د نورو ولایتونو په ګډون، کابل کې هم د خلکو ګڼه ګوڼه زیاته شوې او د عادي ورځو په پرتله يې د توکو د پېر او پلور بازارونه تاوده ښکاري.
په دې ورځو کې د جامو له ګنډلو نیولې تر خوږو، وچې مېوې او خوراکي توکو پېرلو پورې، هر څه زيات وي او کاروباريانو ته هم دا ورځې د ګټې وټې ښه فصل دی.
په دې ورځو کې خیاطان د کابل له تر ټولو بوختو کسبګرو دي او دوکانونه يې د پېرودونکو له ګڼې ګوڼې ډک وي. دوی وایي، په دې شپو ورځو کې يې کار زیات وي او هڅه کوي چې له اختر وړاندې د خپلو پېرودونکو غوښتنې پوره کړي.
خیاط لعل محمد وايي: « د تېر کال په پرتله سږ کال زموږ کارونه کمرنګ وو. زما نظر دا دی چې له پاکستان سره د لارو تړل کېدو او د ایران جګړې د خلکو پر اقتصاد منفي اغېز کړی او نه شي کولی د تېر په څېر توکي وپېري. تېر کال موږ د روژې په نیمايي کې د ډېر کار له امله د دې امکانات نه لرل چې د خلکو فرمایش واخلو، خو سږ کال دا دی د روژې په پای کې هم وخت لرو او کولی شو کار واخلو.»
خیاط جمیل وايي: « که څه هم سږ کال ښه پېرودونکي لرو، خو تېر کال ته نه رسېږي. روان کال د تېر په پرتله کارونه کم شوي دي.»
که څه هم سږ کال عام خلک د بیو لوړوالي خبره کوي، خو بیا هم د کابل ښار په لویو او کوچنیو بازارونو کې د خلکو تګ راتګ زيات شوی او د اختر لپاره د اړتیا وړ توکو پر پېرلو بوخت دي.
له بلې خوا، د اختر لپاره د دودیز چمتوالي له ډلې یو هم د خوږو پېرل دي. پلورونکي يې وایي، د اختر له رانږدې کېدو سره د خلکو غوښتنې زیاتې شوې او د مېلمنو هرکلي لپاره کېک او کلچې پېري.
د کېک او کلچو پلورونکی رازمحمد وايي: « په بازار کې تغییرات شته؛ د تېر کال په پرتله د خلکو اقتصاد کمزوری شوی او لږ خرید کوي. خلک د جګړو له امله نا آرامه دي، مګر بیا هم ژوند ادامه لري.»
کلچې پلورونکی سردارولي وايي: « موږ سږکال له خلکو سره ګوزاره کوو او تخفیف ورکوو؛ ځکه اقتصاد کمزوری دی او خلک غریب شوي. په بازار کې د لومړی درجه کلچو بیه ۲۰۰ افغانۍ ده، خو موږ یې په ۱۸۰ افغانۍ ورکوو؛ دغسې نورو توکو کې هم تخفیف ورکوو.»
خلک بيا د اقتصادي وضعيت د خرابوالي له امله شکايت کوي او زياتوي، ځينې کورنۍ نه شي کولی په اختر او يا نورو عادي ورځو کې کافي توکي وپېري.
د کابل اوسېدونکی رحمت الله وايي: « که د افغانستان هرې خوا ته وګورو، امنیت ښه دی مګر کاروبار څه نا څه زیانمن شوی.»
د کابل اوسېدونکی عبدالکبير وايي: « موږ د امنیت په لحاظ پوره ډاډمن یو، هره خوا شپه او ورځ سفر کوو، ځو راځو.»
د روژې میاشتې په وروستۍ لسیزه کې د بازارونو ګڼه ګوڼه نه یوازې د اختر لپاره د خلکو د دودیز چمتوالي ښکارندويي کوي بلکې د ښار د ورځني ژوند او اقتصادي فعالیتونو د روان بهیر څرګندونه هم کوي.
په ټوله کې امنیتې ځواکونو هم د اخترو شپو ورځو کې د لا ښه امنیت ټينګولو ډاډ ورکوي او له خلکو غواړي چې د عامه نظم او امنيټ په ټينګښت کې ورسره همکاري وکړي.
