Skip to content
په ننګرهار ولایت کې د اسلامي امات ملي دفاع وزارت، کورنیو چارو وزارت او استخباراتو لوی ریاست ځواکونو له لوري د ښار په نهه ګونو ناحیو پیل شوي شپږ ورځني چانېزعملیات پای ته ورسېدل.
مسوولین وايي، د پلټنې په دغو عملیاتو کې یې سلګونه میله سپکې او درنې وسلې نیولي او ګڼ نظامي وسایط او تجهزات یې لاس ته ورغلي.
دوی وايي، په دغو عملیاتو کې سرتېرو سره ښځینه سرتېرو هم شتون درلود او لومړی به د پلټنې لپاره دوی کورونو ته ورتللې.
د ننګرهار امنیه قوماندانۍ ویاند حافظ عبدالبصیر زابلی وايي:« په یادو عملیاتو کې چې د قوماندانۍ له لوري ۴۰ ښځینه پولیسې هم ورسره مل وې. کله به چې مجاهدین یوه کلي ته دننه کېدل، نو اول به یې د کلي ملا امام، د کلي مشر پیدا کاوه او بیا به له هغې وروسته یوه کورته ورتلل. کله به چې کور ته دننه کېدل، لومړی به ښځينه پولیسې دنده کېدې. هغوی به چې کورته دننه شوې بیا وروسته مجاهدین کورته دننه کېدل ، نو بیا یې تصفیه او عملیات کول. »
همدارنګه د ۲۰۱ خالد ابن ولید قل اردو ویاند وحیدالله محمدي د هغو ټولو وسایلو، وسایطو او تخهیزاتو په تړاو رسنیو ته مالومات ورکړل،چې د عملیاتو په تر څ کې نیول شوي دي.
په دغه عملیاتو کې دوه تنه چې له جلال اباد ښار انسان تښتونکو تښتولي وو ازاد شوي او له خپلو کورنیو سره یو ځای شوي دي.
محمدي زیاته کړه:« په ننګرهار ولایت کې، ولایتي اداره، د امینه قوماندانۍ استخبارات او د مجاهدینو ګډ کمېسیون له لوري د ننګرهار په مرکز او په بېلابېلو سیمو کې ګډ چانیز شپږ ورځني عملیات ترسره شول.
په عملیاتو کې ۵۴۵ سپکې او درنې او ګڼ نظامي تجهیزات او وسایط ترلاسه شوي دي. د یادونې وړ ده،چې مجاهدین له هېڅ نوعه مقاومت سره مخ شوي نه دي. »
د امنیه قوماندانۍ ویاند حافظ عبدالبصیر زابلی وايي،هغه خلک چې لا یې هم له ښاره په لرو پرتو سیمو کې دولتي وسایط له ځانونو سره ساتلي،پر وخت دې وسپاري .
زابلي زیاته کړه:« له ټولو ننګرهاریانو په درناوي هېله کوو،که له هر چا سره د بیت المال شیان وي، هغه نظامي وسایط وي، البسه وي او ټوپک وي، هرڅه چې وي، امنیه قوماندانۍ او مجاهدینو ته تسلیم کړي.»
په یادو عملیاتو کې د انسان تښتوونکو له منګلو خلاص شوی کس بیا وايي، ۲۸ ورځې وړاندې له بهسودو ولسوالۍ تښتول شوی وو.
د انسان تښتوونکو له منګولو ازاد شوی احسان الله وايي:« زه د انسان تښتوونکو له لوري تښتول شوی وم. شااوخوا ۲۸ شپې وروسته زه په چانیزو عملیاتو کې راپیدا شوم. زه له مجاهدینو ډېره مننه کوم، ډېر خوشاله یم،چې چانیزو عملیاتو کې یې زه کورته راوستم.»
په لویو ښارونو کې د اسلامي امارت له لوري د چانیزو عملیاتو پراخه هرکلی شوی،خو ترڅنګ یې یو شمېر خلکو بیا له دې عملیاتو سر مخالفت هم کړی دی.
