د پاکستان ملی عوامي ګوند، ملي ډیموکراټیک او نشنل عوامي ګوند د افغانستان او پاکستان ترمنځ پر روانې جګړې اندېښنه ښودلې.
یادو ګوندونو د یوې ګډې اعلامیې په خپرولو سره ویلي، د پاکستان هوايي ځواکونو په بریدونو کې له فرضي کرښې ها خوا افغانستان کې مېشتې سیمې په نښه شوې او ژر تر ژره باید ودرول شي.
دوی دا جګړه د پښتنو پر وړاندې نااعلان شوې جګړه بللې او وايي، د دې جګړې ۹۹ سلنه قربانیان پښتانه دي.
دوی له پاکستان غوښتي چې له دې زيات دې د جګړې لومړۍ کرښې هېواد نه معرفي کوي او د دواړو هېوادونو ترمنځ باید د ښه ګاونډیتوب په اساس اړیکې ټینګې شي.
د پاکستان حکومت د مخالفو ګوندونو په اعلامیه کې راغلي: « پښتانه له لسیزو راهیسې د جګړې د لومړۍ کرښې هېواد په نوم د پاکستان د رول ختمېدو، په سیمه کې د لویو قدرتونو د جګړهییزو او ناوړه پروژو له منځه تلو او د افغانستان او پاکستان ترمنځ د سولهییزو او د ښه ګاونډیتوب په اساس د اړیکو پيل کېدو غوښتنه کوي.»
په اعلامیه کې راغلي، د افغانستان او پاکستان ترمنځ د موجوده پالیسیو نه بدلېدو په صورت کې به جګړه لا اوږده شي او قربانیان به یې یوازې ملکي وګړي وي.
بله خوا، د پاکستان پارلمان مشرانو جرګه کې د مخالف سیاسي ګوند مشر ویلي، روانه جګړه نه یوازې د دواړو هېوادونو په ګټه نه ده بلکې د ټولو اسلامي اصولو سره په ټکر کې او ساده توب دی.
د پاکستان پارلمان مشرانو جرګه کې د مخالف سیاسي ګوند مشر راجا ناصر عباس وايي: « کومه جګړه چې له افغانستان سره روانه ده، دا د هېڅ چا په ګټه نه ده. نه د پاکستان، نه د افغانستان، نه د اسلام، نه د مسلمانانو، نه د قران، نه د دین او نه هم د ایمان. دا یوازې ساده توب دی؛ له همدې امله له دې جګړې سره موږ هېڅ ډول اړيکه نه شو ساتلی.»
له دې وړاندې، افغان چارواکو هم په ځلونو له پاکستان سره د جګړې دوام د دواړو خواوو په زیان بللی او وايي، پاکستان دا جګړه د نورو په غوښتنه پيل کړې او په دې توګه غواړي بهرنۍ پروژې او اجنډاوې عملي کړي.
په ورته مهال، د چارو شنونکي هم په همدې باور دي او زیاتوي، پاکستان خپلو بریدونو کې ملکي وګړو ته مرګ ژوبله اړوي او دغې ستونزې ته له پاملرنې پرته، ادامه ورکوي.
د سیاسي چارو شنونکی اختر محمد راسخ وايي: « که چېرې پاکستان خپله سټراټیژي بدله نه کړي او د غربي نړۍ د پروژو عملي کولو ته ادامه ورکړي، دا جګړه د دوی لمنې ته رسېدلې ده او په کې سوځي به.»
دا په داسې حال کې ده چې پاکستان له تېرې شاوخوا یوې میاشتې راهیسې په روانه جګړه کې یوازې ملکي سیمې او کورونه په نښه کوي او پر مهال یې سلګونه کسان شهیدان او ګڼ نور ټپيان شوي دي.
ملګرو ملتونو، د بشري حقونو نړیوال بنسټ او ګڼو هېوادونو او نړیوالو ادارو د پاکستان هوايي بریدونو کې د ملکیانو په نښه کېدل غندلي او د جګړې د ژر تر ژره درېدو غوښتنه یې کړې.
