د پاکستان پوځي رژیم له خوا د ملکي تاسیساتو او کورونو نښه کولو په دوام، په تورخم ښارګوټي کې یو سوداګریز مارکېټ هم په نښه او بشپړ سوځېدلی. سوداګر وايي، د مارکېټ دوکاندارانو ته له ۳۰۰ میلیونه افغانیو زیات مالي زیان رسېدلی.
د تورخم محلي چارواکي وايي، د پاکستان پوځي رژیم ځواکونو د یکشنبې په ورځ سهار شاوخوا څلور بجې د درنو وسلو ډزې کړې چې په پایله کې یې د لغمان په نوم یو مارکېټ لګېدلی او له ۱۵۰ زیات دوکانونه سوځېدلي دي.
د تورخم ښارګوټي د اصنافو مشر له شمشاد سره خبرو کې له حکومت د زیانمن شویو کسانو د لاسنیوي او همکارۍ غوښتنه کوي.
د تورخم ښارګوټي د اصنافو مشر سیف الرحمن وايي: « له تېرو څو ور ځو راهیسې د افغانستان او پاکستان ترمنځ د نښتو له امله د تورخم ښارګوټی څو ځله د پاکستاني ړندو مرمیو او بمباریو ښکار شوی. تېره شپه ناوخته د تورخم ښارګوټي مربوط لغمان مارکېټ د پاکستان له خوا په نښه شوی او اور یې اخیستی. د دې مارکېټ ۱۵۰ دوکانونه سوځېدلي او زموږ هټیوالو ته شاوخوا ۳۰۰ میلیونه افغان زیان رسېدلی. په تېرو څو ورځو کې هم ورته پېښې رامنځته شوې چې په پایله کې یې هټیو، مارکېټونو او سرایونو ته مالي او خلکو ته ځاني زیانونه رسېدلي. له دولت غوښتنه کوو چې له زیانمنو شویو کسانو سره پوره همکاري وکړي.»
دا لومړې ځل نه دی چې د پاکستان پوځي رژیم عامه تاسیسات په نښه کوي بلکې تر دې مخکې یې هم په تورخم او نورو سیمو کې عامه تاسیسات او ملکي کورونه په نښه کړي دي.
د تورخم اوسېدونکي وايي، تېره شپه ناوخته د پاکستان پوځي رژیم له لوري په ملکي اهدافو ډزې پیل شوې او تر سهاره یې ادامه لرله.
دوی وايي، د پاکستان پوځي رژیم ځواکونه د دې په ځای چې له افغان ځواکونو سره مخامخ جګړه وکړي، ملکي افغانان او عامه تاسیسات په نښه کوي.
د تورخم اوسېدونکی خبیب الله وايي:« په جګړې کې لغمان مارکېټ لګېدلی او خلکو ته سلګونه میلیونه افغانۍ زیان رسېدلی.»
د تورخم اوسېدونکی حنیف وايي: « په دې مارکېټ د پاکستان ګولۍ راپرېوته او اور یې واخست. هرڅه وسوځېدل او خلکو ته ډېر زیات زیان ورسېد.»
له بلې خوا، د تورخم ښاروال مولوي عبدالله مصطفی وايي، د اطفایې څلور اور وژونکو موټرو، د ښاروالۍ ټانکرونه او عام ولس له څو ساعتونو سخت کار وروسته اور مهار کړی او د لا ډېرې پراختیا مخه یې نیولې.
د تورخم مارکېټ داران او هټۍ وال وېره لري چې که جګړه ادامه ولري، ښايي نور مارکېټونه او ملکیتونه هم د اور خوراک شي.
